Aizawl: Zo Re-Unification Organisation (ZORO) hruaitute chuan Union Home Minister Amit Shah hnenah Manipur-a Zofaten rorelna hrang, separate administration an neih theih nan te, Free Movement Regime leh border fencing avanga Zofate harsatna an tawh chungchangte an thlen.
Inrinni khan zan khat riaka Mizorama zin Union Home Minister Shah hi ZORO hruaitute chuan Raj Bhavan-ah kawmin Manipur-a an unau Zohnahthlakte leh Meitei inkara buaina awm chungchangah Zofaten harsatna an neih thu te, Manipur-a Zofate leh Meitei-te chu administration khatah awmho a harsat tur thu te leh Zofaten separate administration an neih theih nana hma la turin an ngen.
Union home minister hnenah hun rei tak lo hman tawh, FMR chu tihtawp niin ramri paltlang tumte tan border pass a phutna chu India chuan January 1, 2025 khan a hman tanah he dan hian harsatna nasa tak a thlen avangin hei hi ngaihtuah nawn leh a, FMR dah leh turin an ngen bawk.
India sorkarin Indo-Burma ramri hung a tum pawh hung a nih chuan a chhehvela cheng indigenous people-ten harsatna an tawh tur thu te, unau an inthendarh tur thu te, indigenous people-te tan zalen taka inkalpawh hi UNO-in an dikna chanvo a pek a nih thu te an thlen bawk.
Home minister hmuhnaah hian ZORO President R. Sangkawia, Treasurer Michael Lalthanmawia, General secretary L. Ramdinliana Renthlei leh General Secretary Lalnunfela Chawngthu-te an kal a ni.