Newcastle United striker Alexander Isak chuan a hma lam hun a ngaihtuah rih loh thu a sawi.
Kum 25 mi, Isak hian season kal mekah goal 22 zet a thun tawh a, St. James’ Park chhuahsana hmun dang pan tur angin an sawi nasa hle a, Arsenal nen pawh an sawi zawm ngun hle a ni.
Isak chuan Pathianni zana Carabao Cup final an khelh hma khan thu thang neuh neuhin a tihbuai loh thu a sawi a, Newcastle United chu trophy lakpui ngei a duh thu a sawi a ni.
“He club hian thil ropui tam tak a hlen chhuak thei a, season kan hman mek hi a pawimawh ber zel a, tun season kal mekah pawh trophy la thei dinhmunah kan ding a, kan la thei a nih chuan tute tan pawh a lawmawm dawn em asin,” a ti.
“Ka hma lam hun chungchang hi ka ngaihtuah lo a, tuna lo ngaihtuah vak pawh hi tul ka ti hran lo. Ka sawi fo tawh angin ka hna neih mek chiah hi ngaihtuah ka duh a, tunah phei chuan thil dang ngaihtuahna hman a awm rih lo. Carabao Cup final kan khelh tur chiah rilruah a awm a, Newcastle hian trophy kan lak ngei a pawimawh ber,” a ti bawk.
Alexander Isak hian Liverpool captain Virgil van Dijk vawi nga a hmachhawn tawhah goal thum a thun bakah mi goal thun tur vawi khat a siamsak tawh bawk a, Pathianni zanah pawh hian boruak tha tak neiin nomawi a la ta nghe nghe.