Nottingham Forest-in talbuai mek, Ipswich chu Inrinni zanah 4-2-a hnehin Champions League-a inlan phak turin beiseina an nei sang zel a. Forest hian point rukin panganaa awm, Manchester City an kalsan ta a, anni hian Inrinni zan vek khan Etihad Stadium-ah Europe-a inlan tum dang, Brighton nen 2-2-in an inhnehtawk.
Palina, Chelsea chuan City tlansan theihna remchang hmu mah se Pathianni zanah Arsenal lakah 1-0-in an tlawm a. Pep Guardiola team aiin point khat chauhvin an sang.
Parukna, Newcastle chuan Pathianni zanah Liverpool chu Carabao Cup final-ah hnehin a chhe berah Europa Conference League-ah tal an inlan phak dawn a. Point khat chauhvin City leh point hnihin Chelsea an phak lo a, anni aiin an khel tlem ve ve bawk.
Brighton pawhin Newcastle ang thovin point 47 an nei a, Bournemouth-in Brentford laka 2-1-a an tlawm hnuah dawtin point 44 an nei ve thung.
Fulham chu pariatna niin Pathianni zana Tottenham laka 2-0-a an chak hnuah a sang pali chu point li chauhvin an la phak lo.
Season liam ta tun ang hunah khan Forest hi tlak hniam hlauva talbuai an ni a, Champions League khelh tumin an bei mek tawh.
Boss Nuno Espirito Santo chuan chu lam erawh an la ngaihtuah lo tih a sawi a, “Keimahni chauh kan inngaihtuah a. A rim thei ang bera thawha kan la khelh ngai loh anga thaa khelh kkan tum a ni,” a ti.
“Kan player 14-te chu ram tan inlanin an chhuak dawn a, tha taka khel tur leh him taka an lo haw leh pawh kan beisei,” a ti.
Hetih lai hian manager Guardiola chu Seagulls nen an inhnehtawk hnuah Etihad Stadium club chu Europe inelna sangah lan phak ngei a la inbeisei hle.
“Ka la ring a, a eng lam lam kan thlir tlat a ni. Miin an ngaih aiin a sang palia tel hi a harsa a, Nottingham Forest leh Brighton pawh an zahawm khawp mai a. Chhan hrang hrang avangin a hautak dawn tih ka hria a; mahse, vawi kua khelh a la awm a, final vawi kua a ni tawh mai,” a ti.
Statistics provider Opta-a League Prediction chuan Liverpool chu 100%-in a sang pali zingah an tel dawn niin a hmu lawk tawh a. Premier League nomawi pawh 99.25%-a an chawi a ring bawk.
Arsenal chu a sang palia tel turin 99.84% chance neiah dahin Nottingham Forest pawhin 68.99% an neiah a ngai a. Manchester City pawhin Champions League an khelh ngei a la ring a, a zawna a vawi 15-na atan an inlan turah a ngai a, 59.86% chance an nei niin a tar lang.
Chelsea chu Arsenal laka an tlawm hnuah a sang palia tel chu 28%-ah a tla a. Newcastle chuan 30.54% chance an nei niin a tar lang thung.
Brighton leh pariatna luah mek, Aston Villa te pawhin inelna sanga an inlan theihna awmin Opta chuan a hmu a, 7.21% leh 2.84% chance an pe.