Aizawl: MPCC Sr Vice President Lalnunmawia Chuaungo chuan Hindu lal ram din tumtu BJP paihthlak a ngai tih a sawi a; ZPM chu sorkar kal tawh zawng zawngte engmah hnathawh nei loa ang chhuahah a puh.
Champhai North Block tlawha hun hmang mek Lalnunmawia chuan khan khaw hrang hrang a fan hnuin nimin khan Hnahlan khua tlawhin party mite nena an inkawmnaah thu a sawi a, India-in zalenna a neih tirh khan ram hruaitu Congress party chuan sakhaw tinte zalen taka an awm theih nan theihtawp chhuahin India danpuiah pawh ziaka dah a nih thu a sawi a. Tunah hian central-a BJP sorkar hnuaiah Kristiante nekchepna a zual tulh tulh a, India rama Hindu lal ram din tumtu BJP chu paihthlak a ngai tih a sawi.
Lalnunmawia Chuaungo chuan, “Mizoram politics-ah tuna sorkarna chang mekte chuan sorkar kal tawhte chu engmah hnathawh nei lo anga chhuahin chhe lai let derah an chhuah a. Vawiin nia kan rama hmasawnna lian tham hi Congress Party hnathawh a ni,” a ti.
Chief secretary hlui chuan MNF-in sum tam tak dawng chungin Tuirial Hydel Project an tihhlamzuih chu Congress party-in a thar thawh leh avangin Mizoramin hydel project puitling a nei a. Mahse, MNF-te thil tih avangin êng chhit man sang tuartu chu mipui an ni tih a sawi a. MNF-in an siam puitlin duh loh ZMC pawh harsatna tam tak paltlangin medical college-ah Congress sorkar chuan a siam a. Sawiselna karah Lengpui Airport an siam puitlin pawh zirchianna awm tak tak lovin IAF hnenah ZPM sorkar chuan hlan tum mah se, vanneihthlak takin Union Home Minister Amit Shah chuan AAI hnena hlan tura a tih avangin IAF hnenah an hlan ngam lo chauh tih a sawi.