Inter Miami forward Lionel Messi chu Argentina-in World Cup qualifier-a Uruguay leh Brazil an hmachhawn turah squad-ah a tel lo.
Kum 37 mi hi Miami-in Major League Soccer-a Atlanta United an hneh tumin bul tan thei tawh mah se Pathiannia an inkhelah hian a inhliam hlauh.
Inter hian a hnuah vawi riat Ballon d’Or dawng tawh hi a hliam dan ‘a nep deuh’ an ti a, a tha lam a nih thu an sawi bawk.
Messi hi kar hmasaa Concacaf Champions Cup-a Jamaican club Cavalier an tlawh tum, hnehna an chan leh goal pawh a thun tum khan bench atangin a tlan lut a, hemi hma inkhel vawi thum erawh a inlan thei lo thung.
Messi hian Instagram-a a story-ah pawh a inkhelh theih dawn loh thu hi a tar lang a, ‘qualification game pawimawh pahnih ka khel thei lo tur hi a zahthlak hle’ a ti a ni.
“Khelh theih reng hi ka duh a; mahse, hliam tenau avangin ka inkhelh leh hma chu chawlh ka ngai leh a ni,” a ti a. “Mahse, fan angin ka tan ang a, ka thlawp ang,” a ti.
Argentina hian tun round-a an result azirin nakuma World Cup khel turin an tling thei dawn a. Champion lai hian Uruguay an tlawh hnuah Brazil an mikhual zui dawn a ni.
South America-a ram 10-in qualifier an khelhah hian hma an hruai mek a, khelh ruk la hmabakah Uruguay aiin point ngain an sang tawh a, Brazil hian point sariha phak lovin pangana an ni mek.
A sang paruk hian 2026 World Cup khel turin an tling thei nghal dawn a, pasarihnain play-off an hmachhawn zui leh ang.
Round 12 khelh tawhah Messi hi goal thun tam ber niin goal ruk a thun tawh a, ram tan vawi 191 inlan tawhin goal 112 a thunsak tawh a ni.
Messi bakah hian Argentina tan hian Roma striker Paulo Dybala leh River Plate full-back Gonzalo Montiel te chu inhliam vangin an inlan dawn lo.
Brazil pawh Messi-a’n Barcelona-a a khelhpui thin, Neymar-a a malpui a tihnat avangin a tel lovin an inkhel dawn a. Santos forward kum 33 mi hi national team-ah a la kir thei lo.