Aizawl: Tuirial bialtu MLA K Laldawngliana chuan nute mizia tha lovin ram rorelna thlengin nghawng a nei phak tih a sawi.
Ningania Bukpui khuaa Khawkunga Hall-a MHIP Lungdai Block Conference a hmanpuinaah bialtu MLA K Laldawngliana chuan, pain chhungkua a din a, nuin a luahlum a, nu chu in chhung missionary a ni tiin, “Nu tel lo chuan chhungkua hi kan luah lum zo lo a ni ber,” a ti.
K Laldawngliana chuan nu thinchhe tak an tam chuan an ramah mi thinchhia an tam ang a, nu duham tak an tam chuan mi duham an tam dawn a. An khawtlangah dawt sawi hmangte an tam viau a nih chuan, a hmain nu dawthei an tam tihna a nih avangin, nute hian mize tha an mamawh hle a, chu chu hnam damna tur a nih thu a sawi.
Juda-ho thufing pawhin, ‘Pathianin hmun tina awm a duh avangin nute hi a siam a ni,’ an lo ti hial tih sawiin, “Hetiang taka nu leh fa chu kan inzawm avang hian mi tinte hian theihna lamah pa kan chhun a, miziaah chuan nu kan chhun duh a ni, an ti. Chuvangin nu chu mihring mize siamtu ber a ni a, nute mizia a that loh chuan kan rilru a tha lo va, ram rorelna thlengin a tuar phak daih a ni,” K Laldawngliana chuan a ti.