Aizawl: Aizawl Two Wheeler Taxi Association (ATTA) chuan hnam dang two wheeler taxi khalh ve an awm leh awm loh dapchhuah an rel.
ATTA hian nimin khan Zarkawt Community Hall-ah General Assembly Vawi 7-na an hmang a. Chawhma lamah ATTA President Lalfakmawia kaihhruaiin inkhawm neih niin, genereal secretary Denis Lalrinmawia Ralte leh Finance Secretary C Laltlanthuama te’n report an pe a ni.
Chawhnu lamah rorel inkhawm neih niin, agenda pahnih an pawm bakah, ‘Ram leilung faten kan chanvo kan humhalh zel nan, hnamdang two wheeler taxi khalh ve an awm leh awm loh dapchhuakin, kan eizawnna min tawmpui loh nan hmalak ni rawh se’ tih resolution an pass bawk.
Kum danga la tih ngai loh angin, kumin khawmpuiah hian ATTA hnuaia branch hrang hrang OB te leh Executive Committee Member-te chauhin rorel inkhawm an nei a ni.
ATTA hnuaiah hian tun dinhmunah branch 35 awmin, kum 2024-2025 chhungin an member boral mi 14 an awm a, kum 2017-2025 April thlengin member boral mi 50 an awm tawh bawk.