Ivory Coast chuan 2025 Africa Cup of Nations khel tur player an puang a, hming 26 tar lan zingah Crystal Palace winger hlui, Wilfried Zaha pawh a tel.
Kum 33 mi, Zaha hi a vanglai chuan ram tan koh hmaih a ni ngai lo va; mahse, tun hnaiah erawh koh a ni ngai tawh lo va. Major League Soccer club Charlotte tan a khelh that avangin kum hnih deuhthaw an koh loh hnuah kohna a dawng leh ta chiah.
Ivory Coast tan hian Premier League player pali – Ibrahim Sangare leh Willy Boly (Nottingham Forest), Emmanuel Agbadou (Wolves) bakah Manchester United winger Amad Diallo te koh an ni.
Sunderland winger Simon Adingra erawh koh a ni lo va, kum 2023 Afcon an champion tuma an player tan hian kuminah hmun a awm tawh lo.
Aston Villa forward Evann Guessand chu koh leh mai theih zingah a awm thung, player inhnukdawk an awm thuta koh theih tur a ni ang.
Inelna hi December 21 atangin khelh tan a ni dawn, club-te chu December 15 hma ngeiin an player kawlte chhuah zalen tura tih an ni a, ram tana inlan tura inbuatsaihna an neih theih nana tih a ni.
Africa ram 24-te chu group parukah then darh an ni a, champion lai, Ivory Coast hi vawi nga champion tawh Cameroon leh Mozambique te nen an awmkhawm a ni.