Aizawl: Horticulture Minister Prof Lalnilawma, Tawi bialtu MLA ni bawk chuan nimin khan a bial chhung khaw thenkhat Thingsulthliah, Seling leh Thingsul-Tlangnuama mipuiten awlsam zawka an dawr theih nana public interview hun a hawng.
Bialtu MLA Prof Lalnilawma chuan, MLA election campaign laiin |awi bialtu MLA atan thlan tlin a lo nih ve hlauh chuan, a bial chhung mipuite nen awlsam zawk an indawr theih nan bial chhungah mipui dawr theih turin hun a hmang thin ang tia a lo sawi tawh angin, a thusawi a taka a rawn bawhzui leh thei ta chu lawmawm a tih thu a sawi.
Prof Lalnilawma chuan hruaitu Pathian, party leh Chief Minister Lalduhoma duhsakna dawngin minister hna hial a lo chelh ve tak avangin official work a tam hle a, duh anga zingin bial chhunga hun hman a har hle tih sawiin, “Amaherawhchu, a remchan dan ang zelin khaw hrang hrangah a tahtawlin mipui dawr theih turin thut zel ka tum a ni,” a ti.
ZPM party kaihhruai sorkar chuan theihtawpin Mizoram hmasawn nan a thawk zel tih sawiin Prof Lalnilawma chuan, “Chief minister leh minister dang zawng zawng hian theihtawp tak meuh meuh an chhuah a, mipuite paw’n sorkar hmalakna te thlawp zel tura ka sawm che u,” tiin, sorkar hmalaknaah duh khawp lohna alo awm anih pawhin, sawisel lama ramtang mai lovin minister-te leh sorkar official-te finchhuah a, thurawn pe fo zawk turin mipui a ngen.