Aizawl: Tun hnai khan dan lova tawlhruk Burma kuhva ro rah eng emaw zat chu Vairengte-ah man a ni. Kuhva rah ro phurtu truck driver tlanbo pali zinga pathumte man tawh.
Thudawn danin April 10, 2025 zing dar 1:28 khan Lalhmachhuana, Asst Commissioner of State Tax, Data Collection Centre, Vairengte chuan Taxation Data Collection Centre, Vairengtea Tax official-te hnenah kuhva rah ro phur truck pali – Hauchinkhupa, Driver, MZ 04 9474 (Burma kuhva rah ro bag 110 phur); Ngaihkhuala, Driver, MZ 04 A 0306 (Burma atanga lakluh kuhva rah ro bag 85 phur); Hmangaihsanga, Driver, MZ 04 A 3464 (Burma kuhva rah ro bag 111 phur) leh Liankima, Driver, MZ 04 A 6509 (Burma kuhva rah ro bag 105 phur)-te chu chhiah awlruk tuma U/S 129 of GST Act 2017 palzutte highway-a an tihdin thu ziakin a thlen.
Truck palite hi ngun taka Tax Official, Taxation Data Collection Centre, Vairengte ten an endik hnuah Burma atanga lakluh kuhva rah ro an phur ngei tih an finfiah a. Hemi bawhzui hian SI David Lalzirliana leh midangte chuan a tul anga hma la nghal turin Taxation Data Collection Centre an pan a. A hmun an va thlen hian a truck driver-ten an truck-te kalhin an tlanbo fai vek tih an hmu a. Truck leh an thil phurhte chu him taka kawl a nih theih nan taxation department kutah dah a ni.
Hemi hnu hian theihtawp chhuahin driver tlanbote an zawng nghal a. April 14, 2025 zing dar 4:30 khan driver pali zinga pathumte – Hauchinkhupa (22 yrs) s/o Pausiama, Kawlbem, Saitual fistrict, Haungaihkhuala (39yrs) S/o Nginzathanga, Champhai Dinthar, Champhai district leh Hmangaihsanga (40 yrs) S/o C. Masthanga, Champhai Venglai, Champhai district te an man chhuak a. An zinga mi, Liankima S/o Rumliana, Champhai Bethel veng, Champhai district chu a awmna chin hriat a la ni lo thung.
Hriatpuitu mi rinawm tak takte awm lai leh hmuh lai ngeiin, Burma kuhva rah ro leh a phurhnate hi man a ni a. Heng kuhva rah ro te hi Champhai atanga phurh, Bagha, Cachar, Assam-a phurh thlen tur nia hriat a ni a. A phurtu driver-te hian Kolasib District Magistrate thupek chhuah an palzut a ni.
Driver-te leh an thil phurh hi dan anga hmalak chhunzawm a nih theih nan District Magistrate, Kolasib District hnenah police-ten an thlen a ni.