Promoter Bob Arum-a chuan January thlaa inhnek a chawlhsan thu puang tawh, Tyson Fury-a chuan boxing a khelh nawn leh tawh a rinawm lo tih a sawi.
Kum 36 mi, Briton hian WBA (Super), WBC leh WBO champion Oleksandr Usyk-a laka a zawna a vawi hnih nana a chak loh hnu lawkah inhnek a chawlhsan thu hi a puang thut a ni.
Fury hi a vawi khat inhnek chawlhsanna a ni lo va, chawlh a puan hmasakah a kaltlangpui lo tawh a. Heti chung hian tuin hma lama a promoter lo ni tawh thin, American Arum-a chuan tun tumah chuan a hawi kir tawh a rinawm loh thu a sawi a ni.
“Inthap mi chu ni ila chuan a inhnek tawh dawn lo tih lamah ka thap ang,” tiin Arum-a hian 5 Live Boxing podcast-a Steve Bunce-a nen an inkawmnaah a sawi a ni.
“Marvin Hagler-a chuan heti hian a lo sawi tawh thin a, ‘mi hausa, silk pyjama nena zana mu chu zingah kawng siam hna thawk turin a tho ngai tawh lo’ a tih thin ang kha a ni,” tiin a sawi.
“Tyson-a pawh hi zingah tho chhuaka hna thawk leh tur niin ka ngai lo va, a lo tawn tawhah training nasa taka kalpuiin inren taka a kal leh chu a beiseiawm tawh lo a ni,” tiin Arum-a chuan a sawi a ni.
Fury-a hi a inhnek hnuhnung pathum chu Saudi Arabia-ah vek niin an ram, UK-a a inhnek hnuhnung ber chu kum 2022 khan a ni a. Hemi tum hian Tottenham Hotspur Stadium-ah a hnampui, Derek Chisora-a chu chiang takin a hneh nghe nghe a ni.
A inhnek chhungin vawi 34 hnehna a chang a, vawi khat a tumpui nen inhnehtawkin vawi hnih a tlawm thung.
A chak loh tum hnih hi Ukrainian Usyk-a lakah ve ve niin nikum May thla khan professional-a kum 15 chhung Fury-a’n chak loh hmel a la hmuh miah loh chu a hmuhtir a. December thla khan inhnek nawn lehin hemi tum pawh hian hnehna a chang zo chuang lo.
Usyk-a laka a tlawm nawn hnu lawka chawlh a puan thut hnuah pawh hian a elpui tam tak chuan inhnekpui atana an duh thu an sawi fo thin a. A gym-ah uluk taka exercise a la hmuh a nih hnuah phei chuan mi tam takin a lo kir leh an ring a ni.
Ring chhunga a kir leh mai tirinawm zual turin kar hmasa khan promoter Eddie Hearn-a chuan rei tak mipuiin an lo nghah tawh, tual chhung fighter pahnih, Fury leh Anthony Joshua inhnek a thleng mai thei tih a sawi zauh tawh bawk a. Gypsy King hian a mi mal tak pawhin an ram chhunga ropui zawk nih a chuhpui hi a be tawh nia sawi a awm bawk a ni.