Aizawl: MPCC Treasurer Dr Lalmalsawma Nghaka chuan ZPM kaihhruai sorkar chu a intiam ang ngeia sawhthing chingtute thar chhuah a bo a bang awm lova sum faia leisak turin an phut tih a sawi.
Nilaini khan Sairanga FCI Godown-a Mizoram sorkarin sawhthing a leikhawmsa dahna hmun tlawhin MPCC Treasurer Dr Lalmalsawma Nghaka chuan tlawhin, Sairang FCI Kudam-ah vawiin thlengin lak khawm sa pawh hralh chhuah loh niin, kudam a la khat vek tih a sawi a. “Sawhthing dah sa pawh tam tak an ro tan mek a, tam takin buara chhungah zung an thlak tan mek a ni. Sawhthing dah khawmna hmun chu a lei tu tur ten bawrin ri hut hut tur a beisei a nih laiin, a reh thuap mai a ni,” a ti.
District hrang hranga collection centre-te dinhmun pawh Sairang FCI Kudam dinhmun ang tho an ni tih an hre leh zel a; chuvangin, sorkar hi che vat turin an phut tih a sawi.
Dr Lalmalsawma Nghaka chuan, “Finance minister leh chief minister bawk, Lalduhoma’n December 11, 2023 khan SEDP sum bang atangin thlai thar lei nan Rs vbc 110 dah a nih thu a sawi a. Kum 2024-25 budget-ah Hand Holding Policy tan Rs vbc 200 dah a ni leh a. Kum 2025-26 ah Handholding Policy a tan Rs vbc 350 dah leh a ni. Chuvangin, sum an neiin kan hria a, an duh chuan an lei theiah kan ngai,” a ti.
RTI a lan danin sorkar hi sawhthing lei nan Rs vbc 38.2 vel chauh an la seng tih an hriat thu sawiin MPCC Treasurer chuan, “Ruah a tla tan tawh a, sawhthing chawhna hun a awm tawh mang lo a ni, he hun tlem te awmah hian sorkar hian tan lain, kan kuthnathawktuten an thar chhuah sawhthing te hi a bo a bang awm lovin a sum faia leisak nghal turin kan phut,” a ti bawk.