Vawi hnih ngawt Olympic champion lo ni tawh, Nadal hi vawi 14 zet a lo champion tawhna hmun, Paris khawpuia clay court-ah an chawimawi dawn a. May 25 khian Roland Garros inelna tan niah Court Philippe-Chatrier-ah chawimawina hun hi an hmang ang.
Kum 38 mi, Nadal hian a vanglaiin vawi 22 ngawt mai Grand Slam title a la a, heng zinga 14 hi French Open title a ni a. Beijing 2008 Olympics singles title leh Rio 2016 Olympics doubles title a lo la tawh bawk a ni.
Nikum November thlaah khan tennis khelh a chawlhsan a, an chawimawina hmun tur, Roland Garros-ah hian vawi 112 zet a chak hman a, vawi li chauh chak loh a nei ve a ni.
French Tennis Federation President Gilles Moretton chuan, “Rafael Nadal kan chawimawi tur hi thawnthu duhawm tak mai a ni a. Roland Garros hmuna inelna hi a zahin a dah sang em em a, clay court hi a dah pawimawh hle a. Hetiang bawk hian amah hi kan zahin kan dah sang em em a, Roland Garros ambassador atan pawh kan duh a ni,” a ti.
Roland Garros Director Amelie Mauresmo pawhin, “Rafa hian Roland Garros hi a tihlu zual em em a, title 14 zet mai a la thei hi Grand Slam tournament zingah chuan a tlukpui awm thei tawh lo tur a ni. Kuminah inelnaah tel ve dawn tawh lo mah se kan zingah chuan a tel ngei dawn a, heti lai hmun nen hi chuan Rafa hi an inzawm nghet tlat a ni,” a ti a ni.