Pathianni zan khan hun tawp dawnah Bologna chuan Inter Milan lakah chakna goal an thun a, hei hian tun season Serie A champion chu play-off hmanga zawn ngai thei dinhmunah a dintir mek.
“Kan inelna hi a la tawp lo,” tiin Inter manager Simone Inzaghi chuan an chak loh hnuah a sawi.
Inzaghi hian a sawi dik a, Inter Milan leh pahnih, Napoli chu goal difference hmang chauhvin an inthlau mek a, khelh nga la awmah Scudetto la zawktu tur a la chiang lo tak zet.
Dan pangngaiah chuan khelh nga a la awm a; mahse, khelh ruk an la nei dawn em tih a sawi theih loh. Inkhel vawi 38 theuh an neih season-ah belh a ngai mai thei.
Serie A-ah hian kum 2022 khan champion tur emaw, tlahniam tur emaw point inzat an awm chuan play-off hmanga a chungnung zawk zawn an kalpui thar leh.
Goal difference chu a pawimawh tho va; mahse, champion tur emaw, tla tur emaw atan ni lovin play-off khelh hunah a nei tha zawk mualah an khel dawn tihna chauh a ni.
Play-off-ah hian minute 90 chhung an inhnehtawk a nih chuan penalty hmanga chak zawk zawn a ni dawn a. Hetiang hi Inter Milan leh Napoli inkarah tun season hian thleng thei a ni.
Inter Milan hian season zahve aia tam chu Napoli uma hun hmangin February 22 khan Serie A chhip an luah tan.
Genoa laka an chak rualin Napoli chu Como mualah an tlawm a, point thumin champions lai hi an sang zui.
March 1 khan an pahnih hian inkhelin an inhnehtawk a, Inzaghi-a team hian an hmahruaina an hloh lo.
Kartawpah khan Scott McTominay-a goal hmangin Napoli chu 1-0-in Monza khelmuala an chak laiin Inter hian minute 94-ah player 10-a khel zawk, Bologna lakah tlawmin an point a inzat ta chiah a ni.
Serie A-ah hian inkhel vawi 38 an neih chinah penalty pet hmanga champion hi an awm ngai lo tluk a ni a. 2004-05 season atang khan he kalphung hi an titawp ta nghe nghe.
Intluktawk an awma khelh khat belha champion zawn chu a fair ber nia ngaiin 2022-23 season atangin an hmang tan leh a, hemi hnuah Napoli leh Inter champion tawhin play-off khelh a ngai lo.
Kum 1964 khan inkhel vawi 34 a awm laiin play-off hmanga chak zawk zawn erawh a lo awm tawh a. Inter chu pahnihna niin goal difference-a sang zawk Bologna nen an khel.
Hemi tum hian Rome-a Stadio Olimpico-ah inkhelin Bologna hi 2-0-a chakin an champion.
Tlahniam thei lamah erawh play-off hmanga him hi tun hnaiah an awm a. 2022-23 khan Hellas Verona chuan Spezia lakah 3-1-a chakin Serie B-a tlak an pumpelh.