Kalphung thar hmanga sorkar na siamtute hnuaiah kan awm mek a, sorkar kal tawhte zawng zawng aia tha bik leh dik bik nih min tiamtute an nih miau avangin beiseina sang tak pawh kan nei a ni.
Sorkar na an chelh atangin an tang hle tih a hriat a, theihtawp an chhuah ni pawhin a lang. Chutihrual erawh chuan kan chenna ram hi democracy ram lian ber, mipuiten kan mi duh zawng kan thlan chhuahna ram a ni tih erawh an hriat thar reng a tul ve tho awm e.
Sorkar laka lungawi lohna nei an awm chho ta sap sap a, an sorkar chhung hian eng nge an la tawn zel ang tih la hriat ni lo mah se, an hmachhawn leh bawhzui danah hian ram hruaitu nih tling leh tling lem lote awka chhuak hi chu mipui hian kan thliar thiam tan ruakin a lang ta.
Kalphung thar sawiseltute chu eptu party lam awnah an ngai vek nite hian a lang dawn dawn thin a, sawisel thiang lo ang maia inngai an mi leh sate zinga an awm thinte inenfiah an ngai hle tanin a lang.
Mipui chuan kan duh kan fak thei a, kan duh loh zawng pawh kan sawisel thiang bawk. Chutihrual erawh chuan sorkar-na chelhtu lam mipuite hian an tuang an tihchhah thiam deuh deuh erawh a tul hle. A chekhnawk thlenga an umzui a, en liam chin an neih loh chuan anmahni zawk hi an intheh-dere zui mai ang tih a hlauhawm hle.
Kalphung thar kal dan kan thlir chho zel a, mipuiten lungawi lote an hmachhawn chhoh dan kan thlir reng bawk e.