Aizawl: Mizoram Cooperative Apex Bank Ltd. Board Meeting chuan kohhran hrang hrang biak in sakna loan dilna 74, a vaiin Rs nuai 2,370 pek a remti.
Chairman Lalnunsanga kaihhruai board meeting chuan kohhran hrang hrang biak in sakna loan dilna 74, a vaiin Rs nuai 2,370 leh mi mal loan dilna hrang hrang 67, avaiin Rs nuai 959 pek a rem ti.
Mizoram hmun kilkhawr, bank dah remchan lohna hmuna bank aiawha dawr theih turin banking correspondent (BC) 44 leh khawpui chhunga cheng, bank kal remchang loten a pung awma sum an khawl theihna nan, kawtkai maia pawisa lam tur – pigmy collector mi 21 an la thar bawk a ni.
Banking correspondent leh pigmy collector-te hi bank nena inthlunzawmna khawl – Handheld Device pek vek an ni.
Apex Bank hian Branch 31 leh ATM Booth 39 leh Mobile ATM pahnih an nei mek a. Deposit Rs vbc 1,685 atangin loan Rs vbc 1,222 an pe chhuak mek a ni.
Board Chairman Lalnunsanga chuan Mizo bank an nih anga Mizo mipui tana thawk tura inzar pharh zel an tum thu sawiin, branch pawh khawpui leh thingtlang lama hawn belh zel an tum thu a sawi bawk.