Mitinin tui kan mamawhna a sang chho zel a, khawpuiah ngat phei chuan kan tla lo reng mai zawng a ni ber tawh e. Hetiang hi kan dinhmun a nih tawh laiin tui ren kan la thiam lo tluang zel a, mamawh tawk neiah kan la inngai chho zel bawk.
Kan lui hnarte an kang chat chho a, khua a roin a thawktu lamin tui pump tur a tlem thu min hrilh chamchi a, ruahtui a rawn tlak deuh lahin tui a nut thu leh thlitfim a harsat thu kan hre chho leh ta bawk.
Heti reng hi kan kumtin hun hman dan a ni chho ta zel mai chu a ni dawn si a, inngaihtuah that deuh hi chu kan ngai a ni.
Bawlhhlawh leh leivung kan duhna lai laia paih mai ching kan la awm reng hi a pawi a, ruahtui a tlak tam deuhin buaina min thlentu a nih ziah ta mai bawk. A tuartu chu keimahni tho kan ni leh thin si a, inenfiah kan va ngai nasa em.
Tunah pawh PHE department lam chuan thuchhuah hial siamin, kan tui tlan ber Tlawng lui a nut nasat thu leh, a thlitfimna lamah harsatna an tawh thu an sawi a, hun engemawti chhung chu tuisem dan a khaihlak leh deuh ngei dawn. Kan fimkhur hi chu a ngai khawp mai.
Harsatna thleng ve hrim hrim hi chu a awm nameuh mai, mah se pumpelh theih reng harsatna insiam lo zawnga khawsak dan hi zir ila, keimahni leh keimahni buaina hi chu i thlentir lo hram ang u.
Bawlhhlawh a paihna hmunah paih mai ila, leivung pawh mahni ram leh duhna laia paih mai lovin, thuneituten paihna an siamah ngei paih i ching lehzual ang u.