Colombian presidential candidate chu an khawpui, Bohota-a a campaign laiin vawi thum kah nia sawi a ni a, mu hnih phei chu a lu-ah a ni.
Kum 39 mi, Miguel Uribe Turbay-a hi Inrinnia len khawthawnna hmuna mi tlem hmaa thu a sawi laiin kah a ni a. Police chuan a titu nia an puh naupang kum 15 mi an man nghal niin tual chhung chanchinbute chuan an tar lang.
Uribe-a nupui, Maria Claudia Tarazona-i chuan a dam chhuah leh theih nana tawngtaipui turin ram mipuite a ngen a. “Miguel-a hi dinhmun khirh takah a awm a. Pathianin amah enkawltu doctor-te a tichaka an kut a malsawm theih nan min dilpui rawh u,” a ti.
Uribe-a Centro Democratico party chuan he thil thleng hi an dem thu sawiin ‘Colombia-a mipui rorelna leh zalenna chu a dinhmun a derthawng mek’ tih an sawi.
Phone-a thla an lak darhah chuan Uribe-a hi a thu sawi laiin a lu-ah kah a ni a, a bula awmte chu phili takin an tlanchhia tih a lang.
Damdawi thiamte chuan a khupah leh a lu-ah vawi hnih kah niin an sawi tih AFP news agency chuan a tar lang a. Thlawhnain Sante Fe damdawi inah lak nghal niin a tualah amah thlawptute an pungkhawm nghal.
President Gustavo Petro-a chuan tharum thawhna chu ‘a dem tak zet’ tih sawiin, ‘mi pakhat laka thil thleng mai ni lovin, mipui rorelna laka thil thleng a ni’ tih a sawi.
US Secretary of State Marco Rubio-a pawhin a dem thu sawiin ‘mipui rorelna tihderthawnna’ a nih thu a sawi.
Uribe-a hian nakuma an ram president inthlana a chuh tur thu hi October thla khan a puang.
Colombia-a politics chhungkaw hung tak atanga chhuak niin Liberal Party nen an inzawm a. A pa kha union leader leh sumdawng a ni.
A nu hi chanchinbumi, Diana Turbay niin kum 1991 khan Pablo Escobar-a kaihhruai Medellin drugs cartel-in an ruk bona atanga chhanchhuah tum a nih laiin a thi a ni.