America’s Got Talent judge-a thu mek leh Spice Girls member Mel B chuan a naupan laia vun rawng inthliarna avanga a tlanchhiat fo thu leh school-a kalpuite’n an auh nawmnah thin avanga a tlan chakna a hman tangkai thin thu a sawi.
Mel B hi infiamna lam tithei tak, a naupan lai pawha tlan chaka sawi thin niin, a nu hi British mingo a nih laiin, a pa erawh Carribbean mi a ni. A seilenna Leeds, North England-ah vun rawng dang a neih vanga naupangte a nih lai atang tawhin hmuhsit a tawk nasa.
“Kum naupangte ka nih lai atang tawh khan thil ka hrethiam daih tawh a, ka vun rawng hian naupang dangah khan nghawng a nei tlat mai a ni.
Vawilehkhatah hming mak tak tak maia koh ka ni nghal a, ‘P**i’ ‘Redskin’ leh N-word dangte nen lam a ri nawk thin. Ka hming mak taka ko chungin min um haw thin a, chuvang chuan tlan chak pawh kha ka zir ta reng a ni. Ka upat deuh hnuah chuan intlansiakna tin maiah pakhatna ka ni deuh zel a, a chhan ber chu naupangte ka nih laia tlan chak ka zir thin vang khan a ni,” a ti.
Rimawi khawvela ‘Spice Girls’ group anga hming a chher tantirh khan 1996 kuma an debut single, ‘Wannabe’ music video an siam dawnin stylist pakhat chuan a sam chu pawt ngil turin a lo hrih tawh bawk a, hmun leh hmunah a hnawl fithla thak niin a sawi bawk.