Aizawl: Mizoram sorkarin tun hnaia police hna a lakah thil dik lova inhnamhnawih mi 10 man an ni tawh a, criminal case pali ziah luh a ni.
Inrinni khan Mizoram Police-in constable (UB/AB/Mechanic) hna a lak tharte result a tichhuak.
Police hna lakah hian Physical Efficiency Test (PET) & Physical Standard Test (PST), constable (mechanic) diltute tan Mechanic Demonstration/ Practical Test leh constable (UB leh AB) diltute tan written exam te neih a nih hnuah, May 23 – June 4, 2025 chhung khan personal interview hi neih ni lehin, candidate mi 630 (Unreserved (UB & AB), Women, Ex-Servicemen, MRHG – 442, Mechanic -18, Sportsperson -170) ten interview hmachhawnin, heng zingah post awm zawng zawng hnawh khat turin mi 259-te chu tlinga puan an ni.
Mizoram Police-in thuchhuah an siamah, Police hna lak dan felfai, langtlang leh dik neih anih theihnan Mizoram sorkar chuan hetiang lama rintlak leh tawnhriat lo nei tha tawh, Infoclab Solutions Private Ltd, Delhi a mi chu a ruai a. Infoclab te hian Radio Frequency Identification (RFID) leh Biometric Identification technology hmangin Physical Efficiency Test, Physical Standard Test, Interview leh Written Examination thlengin an endik a ni.
Written exam endik hna hi mithiam ruaiin, Optical Mark Recognition (OMR) system hmangin endik vek a ni bawk.
Langtlang leh felfai taka Police hna lak hi kalpui niin, pawnlam inrawlhna pakhatmah awm lovin, a ti tha apiang (merit ang chiahin) tlinga puan an ni.
Tlinga puan tak te hian, Medical test leh Police verification an paltlang a la ngai bawk dawn a ni.
Hetih lai hian, Police hna lak dan kalpui a nih chhung hian document lem hmang leh mi aia lo inlante pawh man chhuah niin, criminal case pali ziah luh (register) a ni a, heng thil dik lova inhnamhnawih mi 10 man an ni tawh bawk.