Aizawl: Pachhunga University College chuan an zirlai class of 2025 te tan Grad Dinner Programme Zirtpawni khan PUC Multi Purpose Hall-ah an buatsaih.
He hunah hian Prof. H. Lalthanzara, Principal, PUC chuan Final semester zirlaite fuihna thu a sawi a. Zirlaite aiawhin Vanlalhriatpuii, 6 Semester zirlaiin thu a sawi bakah, zirlaite fuihna thusawi tawi Prof LH Chhuanawma hnen atanga ngaihthlak a ni bawk.
Kuminah hian zirlai 707 (BA 433, BSc 205, B.Com 48 leh BBA 21)-in Pachhunga University College atangin Mizoram University hnuaia UG final exam an bei a ni.
He college zirtirtute chuan kumdang aia UG final exam an tlem ber tum niin an sawi a, CUET (Common University Entrance Test) hmanga admission an tih tan kum 2022-a lutte an ni a, hemi kum hian admission system a inthlak avangin zirlai lut pawh an tla hniam nasa ve hrim hrim niin an sawi.
Pachhunga University College hian kum tin zirlai pass chhuak turte tan 2005 atangin Grad Dinner hi an buatsaih tan a ni.