2024-25 football season hmawr an bawk fel tan tawh a, Europe khawmualpuia footballer tha ber an la thlang lo deuh a. Chawimawina sang, Ballon d’Or dawng thei tur inrinsiakna thawm a ri ring tawh hle a, Ousmane Dembele, Lamine Yamal leh Raphinha te hming chu a langsar hle.
Dembele, Yamal leh Raphinha te hi an khelhna club tan an che tha hlawmin an pawimawh em em hlawm a. Season tawp thlengin chanchin duhawm tak tak an nei teuh hlawm a, mel lung thar an siam nasa hle.
Dembele chuan Paris Saint-Germain chu nomawi pali ngawt mai a lakpui a, amah sawiseltute hmui a chiptir chiang hle a. Spain-ah Yamal leh Raphinha te chuan Barcelona chu nomawi pathum an lakpui.
An pathuma goal an thun zawng zawng belh khawm chu goal 85 niin, mi goal thun tur an siamsak pawh 66 zet a tling.
- Lamine Yamal
Kum 17 chauh la ni mah se Yamal hian season a hmang tha hle a, inelna hrang hrangah goal 19 thunin mi goal thun tur vawi 26 a siamsak bawk a. Barcelona-in nomawi pathum an lak theihnaah a pawimawh hle.
Yamal hi club tan chauh a che tha lo a, Euro 2024-ah Spain a champion-pui thei a, hetiang dinhmuna ding thei tura player pawimawh berte zinga mi a ni a. UEFA Nations League semi final-ah France nen an inkhelhin a che tha hle a, goal hnih a thun a. Nomawi pali a lak mai bakah a khel tha thei hle a, hei vang hian Ballon d’Or dawng thei tura rin kai zingah a tel phah a ni.
- Ousmane Dembele
Inhliam vang leh chet fuh loh vangin kum eng emaw zat chu a langsar thei meuh lo a, season hman zawh takah kha chuan a langsar chiang hle. Goal 33 a thun bakah mi goal thun tur vawi 15 a siamsak a, PSG tlar hma lama hlauhawm ber a tih loh theih loh.
Dembele hi Ligue 1-ah chauh pawh ni loin, Europe khawmualpuiah pawh a langsar em em a, Champions League-ah player namai a nih lohzia a lantir chiang a. Semi final leh final-ah te goal a thun a, PSG chu a vawi khatna atan Champions League nomawi a lakpui a ni.
PSG chu Dembele hian nomawi pali a lakpui a, Champions League mai bakah Ligue 1, Coupe de France leh Trophe des Champions te chu a lakpui hlawm a. Nomawi lak mai piah lamah hian game a thlak danglam nasat dan te, team a kaihhruai thiam dan te chu hmuh hmaih theih a ni lo. Kum 28 mi niin Ballon d’Or dawng tura rin kai ber pawl a ni.
- Raphinha
Europe khawmualpuia player thawh hlawk ber pawl a nihna season-ah Raphinha hian vawi 57 khelhah goal 34 a thun bakah mi goal thun tur vawi 25 ngawt mai a siamsak a, Barcelona tlar hma tichaktu a ni chiang hle.
Raphinha hian La Liga bikah goal 18 thunin mi goal thun tur vawi 11 a siamsak a, hei vang hian Player of the Season chawimawina a dawn theih phah a ni.
UEFA Champions League lamah pawh a che chhe lo viau a, goal 13 a thun bakah mi goal thun tur vawi kua a siamsak a, Barcelona chu semi final a thlenpui thei a ni.
Season tawpah Barcelona chu trophy pathum a lakpui a, mi mal tak pawha a chet that em avangin Ballon d’Or dawn beiseiawm zingah hian a tel theih phah a ni.
Heng player pathumte hi an khelh dan a inang lo vek a, chutihrual chuan football huanga mi mal chawimawina ropui ber tia sawi theih dawng tur hian rin an kai vek thung a, buk rit ber sawi thiam a harsa hle.
Yamal hi kum 17 chauh a ni a, Ballon d’Or a dawng a nih chuan 1997 a kum 21 mi, Ronaldo Nazario record siam, he chawimawina dawng thei naupang ber record chu a khum chiang hle dawn tihna a ni ang.