Aizawl: BJP Mizoram chuan sorkar laipuiin Pradhan Mantri Garib Kalyan Anna Yojana kaltlanga, Ration Card AAY te leh PHH te tan June 2025 thla ration sem hun atana buhfai thla thum ei tur sem lawk tura a ruahmanna a siam chu kuthnathawktute, mi harsa zawkte tana an ruahman chu lawmawm an tih thu an sawi.
Inrinnia an thuchhuahah BJP Mizoram chuan, Mizorama khaw tam tak chu fur ruahtui tlak tam avanga inkalpawhna kawng ping thut awm thei a nih avangin, fur pui a thlen hmaa buhfai an lak lawk theih chuan buhfaia harsatna tawh tur tam tak lakah a chhawk ngei dawn tih a lang chiangin, mipui tana awlsamna siamsaktu, an Prime Minister Modi-a chungah lawmthu an sawi a. Hetianga central sorkarin hma a lakna hi Mizoram sorkar tan pawh a thawven thlak hle dawn tih an sawi.
BJP Mizoram chuan hei mai bakah, ration card car (Non-NFSA) nei te pawh central sorkar pek nghak lo va, furpui lo thlen hma ngeia, thla thum ration pe ve tur leh midangte tihhmuhtuah tanga mipui tana hma la turin Mizoram sorkar an phut tih an sawi bawk.