Aizawl: Mara District Congress Committee, Hqrs, Siaha chuan Mara Autonomous District Council (MADC)-a CEM M Laikaw chu pianna hmun a chian loh avangin MDC-a a nihna atanga bang turin an phut.
Nimina Siaha Congress Bhawan-ah Mara District Congress Committee-in Party General Meeting an nei. He huna kalkhawmte chuan MADC CCB rules humhim anih theih nan M. Laikaw, CEM, MADC chu P.L. Regional Council hlui area chhunga piang a nih loh avangin, MADC CCB Rules Chapter 1, Sub Title 10 (C) – (2) angin MDC ni thei tur a ni loh avangin MDC a nihna atanga bang turin phutin resolution an pass.
MDCC chuan MADC-a CEM nihna chelh mek M.Laikaw chu Thiahratlah, Myanmar a piang a nih thu nau hlanna, ECM Kohhran record-ah chiang takin lang mah se, MDC inthlan dawna a document a thehluhah erawh Siaha Vaihpi a piang anga birth certificate a neih thu leh a official bio-data-ah a pianna a tar lan erawh Pala (Lawngban) niin a danglam leh daih a. Hetiang anih avang hian M.Laikaw, CEM MADC hian moral responsibility la a, MDC leh CEM a nihna atangin bang tura an duh thu an sawi.