Portugal chuan an thenawm, Spain chu Pathianni zan khan Munich-a Uefa Nations League final-ah penalty pet hmanga hnehin a vawi hnih nan nomawi an la.
Cristiano Ronaldo chuan Portugal hi minute 61-naah 2-2 a nihrualpui a, a bak hun pangngai tawk thlengin team pahnihin chak theihna remchang an nei zui tawh lo.
Portugal captain Ronaldo hi hun tawp dawnah a inhliam avangin lak chhuah a ngai a, mittui tla chunga chhuakin a tawpah hlimna mittui nen a awm leh thung.
Ruben Neves-a’n penalty peta chak zawk an zawnnaah chakna goal a thun meuh chuan lawmin an zuang nasa hle a, a hma lawkin Diogo Costa chuan Alvaro Morata-a pet a dansak a ni.
Kum 2023-a champion, Spain hian Portugal-in mumal taka ball an pet chhuah theih loh avangin minute 21-ah Martin Zubimendi hmangin hma an hruai.
Hma an hruaina erawh a rei lo hle a, Nuno Mendes-a chuan minute nga hnu lekah zim angreng tak atangin, Unai Simon-a ven nasatna lam hlat zawk kil lei hrulah chhuih lutin an si phurh a sut.
Nikum nipuia European Championship final-a England laka chakna goal thuntu, Mikel Oyarzabal chuan chawlhlawk hma chiahin La Roja hmahruaina goal a thun zui leh.
Ronaldo a lo lang zui a, Portugal chu chhanhimin Mendes-a pet lut, an lo dan per chu Marc Cucurella-a nek sawnin hnai tak atangin a chhuih lut a, 2-2 a ni.
Hun pangngai a zo va, hun pek belh minute 30 chhungin goal dang a luh belh loh hnuah penalty pet hmangin chak zawk zawn a ni a. Portugal tan hian Goncalo Ramos, Vitinha, Bruno Fernandes leh Nuno Mendes ten an pet goal vek a, Morata-a pet chu Costa-a’n a dansak zui.
A tawp berah Neves chuan chhuih lutin Portugal chu Nations League-a vawi hnih champion thei hmasa ber an ni ta a. Spain pawh hi chak se vawi hnih champion thei an ni a, an nih khalh ta a ni.
Final khelh hma hian vawi nga Ballon d’Or dawng tawh, Ronaldo leh rawlthar ngaihven hlawh, Lamine Yamal te avangin boruak a lian hle a; mahse, anni pahnih hi chawlhlawk hma phei chuan an langsar lo hle.
Munich khawpuia inkhelah hian second half-ah an mamawh lai takin Ronaldo langin an si phurh a sut a, ram tan goal 138 a thunna niin ram tana goal thun tam ber a nihna a belhchhah mek zel.
Yamal erawh Balon d’Or dawng tura rinkai a nihna tilang khawpin a inlan zo lo va, Mendes-a’n a hup bet hneh hle tia sawi an awm pawhin a mak vak lo vang.