Indonesia-a khualzinte tlawh tam hmun, Bali thliarkarah lawng pilah mi pali vel thi an awm a, mi dang eng emaw zat chin hriat a la ni lo bawk tih chhanchhuaktuten an sawi.
Lawngah hian passenger 53 leh thawktu 12 chuangin Nilaini zan dar 11:20 (India-a zan dar 09:05)-ah khawchhak lama Java thliarkara Banyuwangi atanga Bali an pan laiin an chesual niin National Search and Rescue Agency chuan a sawi.
Mi 29 dama chhanchhuah an ni tawh a, mi dangte hi zawn zui mek an la ni.
Thuneituten lawng pil chhan hi an chhui mek bawk a. Lawng neitute chuan a khawlpuiah harsatna a tawk a, a pil zui ta niin an sawi.
Dam chhuak zinga a tam ber hi tuipui kam khua, Banyuwangi-a cheng niin mi dangte hi Java hmun lailia mite an ni tih thuneituten an hming an tar chhuahah tihlan a ni.
President Prabowo Subianto-a chuan a zin mekna, Saudi Arabia atangin chhiatna thleng pawi a tih thu leh ngun taka chhui turin a ti.
Lawng chesual ta hi tual chhung miten Java leh Bali inkalpawhna atana an hman rim em em a ni.
Antara news agency chuan tuipui kamah ambulance ding leh mi chengten kawngpui kamah chanchin thar ngaichanga an nghak thup lai a tilang.
Indonesia hi thliarkar 17,000 vel awm khawm ram a ni a, lawng hi an inkalpawhna hmanraw lar tak a ni a, hei vang hian chetsualna pawh a thleng fo va, himna lama inkaihhruaina a siamin zawm a hlawh tha lo thin hle.
March thla khan Bali-ah hian mi 16 chuanna lawngleng chesualin Australian hmeichhia a lo thi tawh.