Fur kan lut chho a, Mizoram chhunga inkalpawhna kawng hrang hrang a chhe leh tawh hle. Siam tura lo inhmakhua lawk theih nimahse sorkar in siam mang a nei lo a, lirthei neitute an khawngaihthlak hle.
Kan chak lakna kawng pawimawh tak Vairengte atanga Sairang inkar kawng chu Congress Thalaite chuan nilaini khan tlawhin, Mizoram Tipper Association pawhin June ni 26 atang khan siamthat hnatlang an nei bawk.
MTA lam hnatlang hian a zawng zawng siam thei lo mah se, a chhe zual laite chu anmahni sum sengin lung hmangin an hnawh a, hnatlang chhuak pawh an tha thei hle niin an sawi.
Heti tak maia kan kawngpuiin chhiat lam a pan kumtin mai hi a veiawm a, a changtu minister ber lah chuan a mawhah a la lem hlei lo a, a thusawina hmun pakhatah phei kha chuan a mawhphurhna a nih loh thu a sawi hial emawni? A va zahthlak em!
MTA lam hnatlangte hi sorkar chuan cheng nuai 5 in a pui lehzel a niawm a, zahah an la lem lo tluang zel niin a lang a, kan hawiher hi a mak thin ngawt mai.
Kan kawngpuite hian duat an mamawh a, kan lirtheite hian kawngpui thaa tlan hi an phu bawk. Heti tak maia fur a thlen apianga kan buai ta mai hi a manganthlaka, sorkar hian chet la thuai thuai teh se. A changtu minister in a ngaihna thlawt a hre lo a nih pawhin a changtu lam siksawi thlengin sorkar hian hreh teh suh se.