Aizawl: Mizoram Lok Sabha MP Richard Vanlalhmangaiha chuan a MPLADS hmanga blood donation bus tur, mi 13 thut theihna, Tata Winger New Model lei chu Inrinni zing dar 8 khan Association for Voluntary Blood Donation, Mizoram (AVBD) hnenah a pe.
Bus inhlanna hi Model Blood Bank, Civil Hospital, Aizawl tualah neih a ni a, AVBD Vice President K. Zothanpara’n a kaihruai a. MP hian bus chabi leh document pawimawhte AVBD President C. Lalnunnema hnenah a hlan a ni.
MP Richard Vanlalhmangaiha chuan, thisen pek a ngaih pawimawh thu leh amah pawhin thisen a pek ve thin thu a sawi a; AVBD-in a hnena bus an dil pawh tihhlawhtlin ngei a duh thu leh blood donation bus thar chu a MP Fund hmanna puitling hmasa ber a nih thu a sawi.
Richard Vanlalhmangaiha chuan, bus thar chuan Blood Bank-a thawktute rilruah phurna leh inpek lehzualna thar tuh se, damlo thisen mamawhten a hun takah thisen dawng theih phah nan hman ngei ni se a duh thu a sawi bawk.
AVBD President C Lalnunnema chuan an dilna ngai pawimawha MP Richard Vanlalhmangaiha’n bus a pe chu an lawm tak zet thu a sawi a. Civil Hospital, Aizawl Senior Medical Superibtendent Dr Lalchhuankimi pawhin thu sawiin, Lok Sabha MP-in AVBD hnena bus a pek Civil Hospital hman atana ruahman a ni chu an lawm tak zet thu leh, tangkai taka hman a nih tur thu a sawi.
Bus hlanna inkhawmah hian Civil Hospital, Aizawl Medical Superintendent Dr. K. Rothangpuia, Model Blood Bank HoD Dr. C. Zohmingliani, AVBD hruaitute leh Civil Hospital leh Blood Bank-a thawkte an tel a ni.
Blood Donation Bus tur hi October, 2024 vel atangin buaipui tan a ni a, air condition-a thuam niin, Rs 18,22,027 senga lei a ni.