July ni 5, 2025 (Inrinni) khan Synod Conference Hall, Mission Vengah Adviser to CM Lalmuanpuia Punte chuan F. Lalramliana lehkhabu ziah, “Damlai kawng chhukchho” tih a tlangzarh.
Muanpuia Punte chuan hetiang lehkhabu ngaihnawm leh zirtir nei tha, Mizoten kan nei leh thei hi lawmawm a tih thu a sawi a. A bial chhung Sailulak khuaah hetiang sulhnu nei ropui an awm avangin a lawm hle thu a sawi a.
Muanpuia chuan, Mizote hian lehkhabu chhiar kan uar thar leh zel a ngai hle a a hriatthu a sawi a, kan inzirtirnaah pawh pi leh pute nunpui tlawmngaihna te, aia upa zahnate leh kan Mizo nun, naupang tè kan nih atanga pitar/ putar kan nih thleng nun inziahna bu tlangzarh theia a awm chu lawmawm a tih thu a sawi bawk.
Hetiang lehkhabu tha hi a bial chhung khawtinten chhiar se a duh hle tih a sawi a, a bial khawtinten an chhiar theih nan a bial khawtin Library-a dah vek tura hma a lak tur thu a sawi bawk.