- Zion Lalremruata
Tun hnai deuh lawk khan thian thenkhatte nen Mizoram Sawrkar in a Police/Sipai(Armed &Unarmed) a lak dan chungchang kan sawiho a. Kan thianho hi kan tamlo nang’a, a tam zawk mahin tha hle a kan hriat laiin; a tlem zâwk lam kha chuan a tha tawk lo puanhnuai thil a awm te kha an ti a. Mizoram Police te hi kan Ram leh Hnam timawitu, tunhma phei chuan India ramah pawh Police tha ber pawla hriat an ni. Assam nena Vairengte a Dt 26th, July, 2022 chawhnu lama inkahna a thlen tumte khan an huai asin, Assam Police ho angin an tlan chhe ve lo.
Sawiseltuten an selna pakhat ber nia hriat chu a latu/recruiters atan Mizoram pawn lam mi hman an nih kha a ni. Mizoramah hetiang ang ti thei Mizoram Police tha tak tak an awm laia, sum senga phai lam mi han chah chhuah daih kha tul an tilo, mizo leh mizo a inzahloh thlâk bawk.
Mizoram Police/Sipai te kha Chhattisgarh State buaiah duty tûrin kum 2006 khan an kal a, an kal hma khan CIJWS ah training an nei hmasa phawt a. CIJWS camp, Lailapur ah an inkulh a, khatia mipa rual awmkhawm ta na na na chu zu leh thil dangte a lo awlsam bawk a; an discipline a chhia in chanchin mak pui pui kha an nei fo va. Zan khat phei chu an zînga mi 5 vel khan buaina siamin, an buai dan kha a satliah lo viau leh nghal a(he thil hi khatih lai khan Chanchinbu ah pawh an chhuah nual a ni). Aizawl lama kan hruaituten he buaina hi a hmuna zu zirchiang tûrin min lo tih angin kan khaw Val Upa nen thim hlimah Lailapur kan pan thla a. An camp kan han thleng thla chu Gate duty te khan polite tak hian minlo dawngsawng a: an Commandant awmna lamte min kawhhmuh a, Commandant quarter kan panna lamah hian a then an lo in zilh a, a then an lo titi hlawm a; an boruak kha a pui ang reng viau. A nihna takah chuan an camp chhung luhna gate duty te atang khan Zu no an lo dawm a, camp chhung hmun thenkhatah pawh khan khatiang hmuh tur kha an awm nawk a ni. An Commandant kan hmu a rei pawh awm lo in kan chhuahsan zui a, kan lainat hle a ni. Tin, training ho zîngah khan ruihhlo in a tihbuai ve hauh loh fel tak tak pawh an awm nual bawk a ni. Politics kal diklo in ram a nghawng chhiat pawi zia te sawi pahin rei lo teah kan khua kan thleng chho zui ve leh bawk a, kha mi zan kha chu ngaihtuahna a kal ding hle mai.
CIJWS Col.Adm khan a hnu lawkah lengah min sâwm a, India ramah kha mi tuma training ho ang em em a discipline chhia a la hmuh loh thu a sawi nghe nghe(a zahthlak duh viau) Duty lai ngei a Uniform ha lova han dar bah mai te, kawnghren awrh ta mai maite kha… A pawi ber mai chu eng ruihhlo ber nge an ruih tih hriat loh, normal lo kha an awm nual a ni.
A hnu lawka kan hriat danin khang Police ho kha politician leh officer thil tithei zualten an duhsak zawng an lakte an ni (kan thiante nau pakhat damdawi rui reng pawh kha he mi tuma training zîngah khan a tel a,(an hnaivai tak Minister zarah tlinglo pui kha a lo tling a ni). Tunhma lam khan Congress Bhavan leh Hnam Rûn List kha a ri ring viau zêl a nih kha maw. Kan mi hriat chian physical leh education lama fit tak tak; tlin ngei inbeisei mahse tlingzo ta lote rilru kha a na thin mange. Hetiang hi a ni kan Mizoram dinhmun kha!Hmelhriat leh sawipuitu tha neilo tan a beidawn thlâkin beisei tur a vâng tak zet zet a ni.
Tin, tun tuma Police la tu/recruiters atan Mizoram pawn lam mi(hnam dang daih) kan Sawrkar in a hmang daih hi thil finthlâk tak a ni. Mizo leh Mizo inkarah chuan ven tur a tam dawn a, Politician te chauh pawh nilo in Officer ho thlengin. Tin, kan khua ah hian Sipai hi vawi tam tak an la/recruit tawh thin a, hengah hian a hmun nghaktu CIJWS lam khu an in rawlh khât khawp, hmun dang atanga lo kalten an buaipui thîn a ni. Hetianga hma la ngam Chief Minister Pu Lalduhoma leh Department changtu Pu K.Sapdanga ten an ti tha in Department tan pawh thil hrisel tak a thlen ngei ang.
Inthlan hma a an intiam anga ZPM kaihhruai Sawrkar in tunhma a kan la hriat ngai hauh loh kalphung thar a kalpui ta nual hi a lawmawm in beiseina a sâng hle. Mizoram Kuthnathawktute tharchhuah harsatna tam tak karah an leisak te hi ava pui em! APLM hnuaia din turin Regulated Market a lo lang chho ta te hian beiseina sang tak min neih tir a ni. Tun tuma Police felfai(fair) taka lak hi duh tawk mai lovin hna dangah pawh felfai taka kalpui zel turin tan han la sauh sauh se la; chutiang a nih loh chuan beidawnna nasa leh zualin kan Mizoram hi a tuam palh ange.