- Dr. C. Lalrampana
Saphovin a “hun takah engkim ti la, a hmun takah engkim dah rawh” (A place for everything and everything in its place) an tih thin hi a dikin a finthlak hle. Kan Bible-ah pawh “Engkim tan hian hun ruat a awm a, van hnuaia thiltih zawng zawng tan hun remchâng a awm” tih a ni. Heng thufing tak takte hi han bihchian hian kan ram hruaitute hian ram mipui hmasawnna hna an thawh rêng rêngin a hun takah engmah an ti ngai lova, a hmun takah engmah an dah ngai hek lo. Hei vang hian kan ram leh mipuiin hma kan sawn theih loh phah a, naupang sawngnawi lu lian bur, taksa dang thang thei si lo ang kan ni.
Lo neitu hnena thlaichi an sem lahin thlai chin/phun hun tawh loh hnu, tlai khawhnuah an sem a, jhum control 1987-1988 lai vel pawh khan lovahna tur Chempui kha lovah hun pelh tawh hnuah sem a ni khan a lang a. NLUP, SEDP leh thil dang sem pawh an sawi hun ang lo hlirah an sem a, chu pawh a hming maiin chauh thu barawh lek fangin sem a ni. Sawhthing an leilahin a hun takah lei lovin a tawih kawi uih rimchhe vung vung hman thin. A thlawna zirlaibu zirlai naupangte hnena an sem lahin sikul luh hmain an sem thei rêng rêng lova, zir hun (academic session) chanve ral dawnahte an sem thin. PG scholarship leh merit scholarship, sport incentive etc.-te lah a hun takah sem lovin nawrh khum kher an ngai a. Contract-a rawih hnathawktute leh CSS hnuaia hnathawktu hrang hrangte lah a hun takah hlawh an pe ngai hek lo. Zirtirtu awmhmun an sawn lahin sikul luh hnu feah an sawn buai kawisawi buangbar leh chiam zel a, zirlaite nunphung a khawih buai nasa thei hle. Hei bakah hian zirtirtu engemawzatte chu an awmna tur hmun sikulah dah lovin directorate office leh subordinate office hrang hrangah a dah ther fer fur a, a tawpah zirtirtu indaih loh avangin sikul khar, sikul kai tur, pisa kai tur dan ngai khawpa nawrhna a chhuakleh fo thin. Chutiang zelin dawktawrho lah thingtlang hmun hrang hranga sawn siin a taka kal mumal lem si lovin khawpuiah kan mamawh tiin an tawmkhawmtir tlurh a, a tawpah thingtlang lamin an tuar a, nawrh khum an ngai leh thin.
Mizoram hmun hrang hranga inkalpawhna kawngpuite lah a hun tak, thal khawthat hun lai zawng zawngah siam duh lovin an ngawi tlat a, fur ruahtui tlak, siam hun tawh lo leh siam harsat lai takin mipui vote beisei vang niawm takin an khawihleh hnuhnawh sil a, mipui ei leh bar mamawh engkimin a tuar ta thin a ni. Tunah pawh furpui vanglai takin NH-306/06 kawngpui chu ngaihsak tak tak ni awm takin zan riak meuhvin PWD Minister-in Sairang-Kawnpui kawng thawm that mek a’n vilzui a, kalphungthar mak tak leh dangdai tak chu a ni e. Sairang–Kawnpui inkar kawng thawmthat hna kalpui mek hi Public Works Department, NHIDCL, Khawtlang hruaitute bakah Minister leh MLA-ten ngawrh takin an vilpui a ni. A hmain PWD Minister Vanlalhlana hian tum engemaw zah a hmunah enpui tawhin tunah kawng siam hna hmasawn dan enpuiin thawktuten harsatna an neihte chinfel zung zung a nih theih nan zan riak hialin a vil ta chu a ni a, eng tak ang zel ang maw! PWD Minister Vanlalhlana hian Sairang –Kawnpui inkar kawng, lirthei tan a tlan tlaka siam vat a nih theih nan PWD leh NHIDCL-a thawktute nen tangkawpin theihtawp chhuah zel a nih thu a sawi lehnghal a. Zoram mipui hmuha mark tihthatna niawm takin PWD Minister hian Engineer-in-Chief Er. H. Zoramliana, Chief Engineer (Roads) Er. David Sapzova leh Chief Engineer (Highways) Er. Robin Lalrinawmate a hruai tel bawk niin a lang.
ZPM sawrkar hian SDRP chapter xix article 138-a a tarlan ang khan a sawrkar tirh Dec 8, 2023 atang khan thal khaw tha hun lai apiangin kawngpui chhiate hi a hun taka siamin ngaihtuah tak tak ni se, NH:306/06-te leh kawngpui dang chhe tak tak, lirtheia ei zawngtute che chhuak thei lova an din thup ngai mekte hi a thleng lo tur. Chhuanlamah a bik takin NH:306/06 phei hi chu “MPWD leh NHIDCL chan chin chuti khati” tiin an inhnial kual vel a, social media platform hrang hrangah an insawithiam zuah zuah a, mahse, mipuiin an pawm chuang lem lo. Pi Lalruotmawi hlasak-”Thiamthu sawi thei ka ni lo” tih bak mipui sawrkar hian sawi tur a nei lo. Achhan chu “MPWD chan leh NHIDCL chan chin a ni” tia chhuanlam siam siam kawisawi si khan tunah tuamah thliar hrang chuang lovin NH-306/06 kawngpui hrûl khawhrang hrang vantlang mipui nen chawhchawrawihin furpui chêt lak harsat khirhkhan hun lai takin kawng siam hna an thawkleh lawi si hi thil ãtthlak ber niin a lang. Thal lai, kawngpui siamthat/thawm that hun lai khan a chhe zual lai apiang siam tha nghal zel se’ng chuan PWD Minister leh a staff-te hian riahchilh meuhin kawngpui thawmthat hnathawh hi an vil a ngai hauh lovang. Chuvangin, tun atang chuan Zoram Sawrkar hian a hun takah engkim tiin a hmun takah engkim dah thin tawh se, kan Zoram hian hma a sawn ngei ang.