- Lalnuntawma Fanai; ZRKS Run, Electric Veng
Ministry of Power thu angin Mizoram pawh Electric Pre paid-ah kan luh dawn avâng te, Electric Smart Metre leh Online payment chungchangahte P&E department hotute nen kan inkawm a, kan inkawmna tawp lamah AR ram chhuahsana Gas insulated sub station (G.I.S) dah belh chungchang an sawi zauh a, ka beng a verh hle! A chhan pawh AR ram chhuahsana thil tam tak dah belh hi mi tam takin an duh lo nia a lan avâng leh kan environmentalist ten thing awmsa tih chereu hlauhna an neih avângte a ni ber a. P&E deptt hotute thil sawi hi ka ûmzui ta a, mipuiin ngaihdan zau an neih theih nan, kei pawhin ka hriat thiam chiam bik loh tur technical tak tak ziak bik loin, hetiang hian han sawi zui ka châk deuh a ni.
G.I.S station hi eng nge tih hi zawhna pawimawh tak a ni. Power Sub Station tih hian, tunhmaa kan hriat thin ban tam tak, kak tiai tuai, hmun awh zau chi kha kan mitthla lo thei lo a, âwm tak a ni. Mahse, mithiam ten an sawi dan chuan, G.I.S bun tur hian, building pangngai tak pakhatah pawh a leng vek thei an ti! Sorkar-in AR ram chhuahsan enkawl dan tur committee a dinin ruahmanna a siam mekte en hian, nakina a hlawhtlin huna kan la mamawh hmasa tur chu power supply tha hi a ni. Chat lak loa power supply tha nei tur chuan, P&E deptt rawtna G.I.S station hi a pawimawh hmel hle. Sub-station hlauhawm lo, electric avânga chetsualna laka him si, hmun awh zim si, In chhawng khat lekah pawh leng, 33kV G.I.S leh covered conductor/ ABC/ underground cable hmangin G.I.S hi din theih a ni. A hrui atan pawh mi man thei lo chi (insulated) hman tur a ni.
Tunah hian Langar (Pavillion thlang, Tuithiang kawng chung) hmunah hian Distribution Transformer 630kVA 11/0.415kV dah mek a ni a, hmun dang tibuai lovin helai hmun hi laih zauh belh hlekin Power transformer, 33/11kV a dah theih dawn. Helai hmunah hian truck/trailer a thlen theih avângin, Transformer lian phurh luh leh chhuah a rem dawn a, electric lak luhna hrui pui luh leh chhuahna awm sa a nih bawk avângin a remchang dawn hle. A bul maiah G.I.S awmna tur In lian vak lo sak belhin 33kV Sub-Station a siam theih mai dawn tihna a ni.
P&E Engineer ten an sawifiah dan en teh ang, “AR Langara awmsa transformer hi veng tina transformer kan dah ang chi – 11kV atanga mipui hman tur 230V (3phase a nih chuan 400V) a, lo tihniam (step-down) tu 11kV/0.4 transformer a ni. Power hi 11kV line a pek luh a ni. Tuna AR a dah kan duh hi chu Transformer lian (Power transformer) 33kV atanga 11 kV a step down tu tur a ni. Tichuan, veng hrang hrang chawmtu tur 11kV line a pe chhuak thung ang. 11kV line pakhat hian vengchhunga transformer dah ang chi veng engemaw zah a chawm, tuna AR chawmtu 11 kV feeder hi Treasury feeder kan ti a, Bazar, Tuithiang, AR, Treasury, Assembly etc. transfomer engemaw zat a chawm a. 33kV Sub-Station hian 33kV atangin 11kV ah a step down a, 11 kV feeder engemaw zat a pe chhuak ve thung. AR ah 33 KV Sub-station kan dah dawn chuan 33kV line a kan chawm a ngai dawn a, tuna ruahman chhinna ah chuan Chite Sub-station leh Mualpui Sub-station (hmun 2) a\angin kan chawm ang,” tih a ni.
G.I.S station dah belh sawi a nih chhan hi, tuna Power House Electric venga mi 33kV Sub-Station hian min dawl zawh tâk meuh loh vang a ni. AR leh a chhehvelah hian tunhma atangin voltage hniam avângin harsatna a awm thin a, Roof Top Solar pawh dah a harsat phah! Tin, AR chhuahsan ram hmannaah load demand a awm belh phei chuan, a chawmtu tuna power house a 33kV sub station hian a zo dawn lo tihna a ni a, sub station siam thar loh chuan in ên chhawk hial a ngai tawh dawn tihna a ni. AR ram chhuahsan enkawl dan tur Chief Minister Pu Lalduhoma hoa ngaihtuahtute hi, kan ram aiawh atan an kim thawkhat hle a, tha fein ro an rel zel turah ngai ila. Tunhnaia ro an rel hnunghnung bera hmalakna tur en khan, power indaih lohna awm mek nen, power mamawhna a nasat belh dawn a, chu chu a hriat pawh an hre sa vekin a rinawm. Thlasikah phei chuan a overload tan tawh a, Aizawlah hmun awl a vâng tawh a, tih len belh ngaihna a awm tawh si lo. Nakinah chuan in ên chhâwkte pawh a la ngai thei dawn nitein an hria a, P&E hotuten a sat laia den fel ngei an duhna hi mipui hma an ngaihna vâng a ni ngei turah ngai ila, chu chu kan hotute pawhin an hai hauh loin a rinawm.
Mak deuh chu, tunhmain hmasawnna hna pawimawh thawhna thenkhatah Power Supply a kan dinhmun tur leh a kaihhnawih tur lam ngaihtuah telna hmasa awm mang loin thil kalpui a awm thin a nih hmel, a hnufe-ah ngaihtuah tel chauh a nihin, duhthusamin a tha thei lo fo niin an sawi. Kalphung thar sorkar hnuaiah chuan, ‘i zuan hmain en rawh,’ tih kha changchawi ve ngawt phawt teh ang. Hetiang hi kan hmabaka thil awm a nih avângin, AR ram chhuahsan enkawl zui dan tur leh G.I.S inzawmna hi kan hotute leh mipui hian han hre thar tlang ila, a êng zawngin thlir phawt teh ang.
P&E deptt hotute hian Online Payment chungchang pawh an sawi uar hle a, hei hi mipui tan leh thawktute tana awlsamna thlenna tur a ni ber. July ni 29, 2025 (Nilaini) khan Power House-ah ka lêng lut a, Online payment a kan dinhmun chu EE te nen kan enho a, Distribution Division-ah consumer 53,000 vel an neih laiin, Online a bill pe hi chhungkaw 29,736 (56%) an awm a. Revenue Division-ah consumer 63,772 vel an neih laiin, online a bill pe zat hi chhungkaw 25,000 (40%) a ni. A chet reng avângin vel tiin sawi a ni. Smart phone, Bank AC te kan nei tawh a, online a bill pe heti zat kan awm ta hi a lawmawm a, hma pawh kan sawn hle a. Chutih rualin, hei aia tam hi kan la ni thei a, eng emaw thila harsatna awm thei erawh thu hran ni se. AR ram chhuahsana G.I.S dah chungchang nen hengte hi mipui tana ngaihtuahna tizautuah a tan i beisei ang.