Ghanaian defence leh environment minister-te chu an ram laili, Ashanti region-a sipai helicopter tlaah mi dang parukte nen an thi tih sorkar thupuangin a sawi.
Kum 50 mi ve ve, Defence Minister Edward Omane Boamah leh Environment, Science & Technology Minister Ibrahim Murtala Muhammed te thihna hi Chief of Staff Julius Debrah chuan ‘ram pum chhiatna’ a nih thu a sawi.
Minister-te an thi tih puan hma hian Ghana Armed Forces chuan an thlawhna, thawktu parthum leh passenger panga chuanna chu ‘radar-in a hmu lo’ tih an puang.
An khawpui, Accra atangin Nilaini zing dar 09:12 (India-a chawhnu dar 02:42)-ah thlawk chhuakin Obuasi khuaa dan lova thil laih chhuahna awm ena titawp tura kal an ni.
Social media-ah an chuanna helicopter tla ta kang chhe tak thlalak a darh nasa hle a. Thuneitute chuan an chetsual chhan an la hre lo.
Chief of staff chuan an ram puanzar chu a ngul chanvea zar turin thu a pe nghal a. An chuanpui mi dang thite pawh ‘ram tana an thawhnaah an thi’ tiin President John Dramani Mahama leh sorkar aiawha a sun thu a sawi bawk.
Ghana-a Deputy National Security Coordinator leh agriculture minister hlui, Alhaji Muniru Mohammed chu thi zingah a tel a. Rorel lai, National Democratic Congress party Vice-Chairman Samuel Sarpong a tel bawk.
Thawktute hi Squadron Leader Peter Bafemi Anala, Flying Officer Manin Twum-Ampadu leh Sergeant Ernest Addo Mensah te an ni.
Boamah hi Mahama-a kaihhruai sorkar hmasaah khan communications minister a ni a, a hmain environment minister a ni bawk a. Defence minster a nih hnuah an ram hmar lam, Burkino Faso nena an inrinaa jihadist-te beihnaah a thawk nasa hle.
A lehkhabu ziah, an president hlui, John Atta Mills chanchin, ‘A Peaceful Man In An African Democracy’ pawh kumin kum tawp lama chhuak tur a ni.
Muhammed-a hi an ram khualrel leh lui leh dil tibawlhhlawhtu, dan lova rangkachak laih chhuahna titawp tura nasa taka beitu a ni bawk.
Dan lova thil laih chhuahna, Galamsey an tih tam lutuk duh lohna hi nikuma Mahama-a’n president inthlan a chuh vel lai khan a nasa hle a ni.