Chief Minister Lalduhoma’n nimin khan St. Xaviers Sr. Secondary Millenium Hall, New Delhi-a Northeast Catholic Community of Delhi (NECCOD) Fresher Social vawi 33-na chu khuallian niin a hmanpui a. Education Minister Dr. Vanlalthlana leh Mizoram MP (Lok Sabha) Richard Vanlalhmangaiha ten an tawiawm.
Chief minister hian Catholic kohhran hi India rama zirna, hriselna leh mi chhumchhiate chhawmdawlna lama langsar taka rawngbawl thin an nih thu leh Mizoramah pawh rawngbawlna ropui tak tak an kalpui nasat thu a sawi a. An nu leh paten ram leh khawtlang tana eng an lo chhit tawh kha thangtharten an chhunzawm zel tul a tih thu leh, an rawngbawlna ropui tak tak zar zotu an tam tawh a, tun thlengin Mizoram hian an rawngbawlna chu an chhawr tih a sawi.
Catholic kohhran mi leh sa, Delhi-a khawsate huikhawmtu tha tak NECCOD an nei chu tha a tih thu sawiin Lalduhoma chuan, kuminah Fresher Social vawi 33-na hial a buatsaih ta a. Kum 30 chuang tangkai takin rawng a bawl tawh a, kohhran leh ram tan chauh ni lovin hmarchhak mipuite inunaunan pawh NECCOD hian a thawhhlawk hle tih sawiin, NECCOD rawngbawlna a fak.
Agnes Fanai kaihhruai Fresher Social ah hian Lucas L. Kamsuan, Joint Secretary, Ministry of Finance chu khualzahawm niin, NECCOD President B.K. Angam, General Secretary Ngaopuni Manah leh Rev. Fr. Vijay Baretto ten thu an sawi bawk.