Aizawl: MNF Treasurer Lalruatkima chuan Advisory Committee kaltlanga kohhran ram chhuhsak tumna kal mek chu an hmuh hmaih lo tih a sawi.
Thawhtannia MNF Hnam Run chhung inkhawmah thu sawiin Lalruatkima chuan, Chief Minister-in ‘MLA 27 mipuiin min thlang a, rorel pui kan ngailo’ tia ni September ni 22, 2025-a a sawi hnuah, AR luah ram chhuahsan hnu enkawl dan reltu Advisory Committee ah tel zui remchang tawh loah an ngai tih sawiin, “Pathian ram din tuma insawi chunga Kohhran ram chhuhsak talh tumtute hian, he committee hminga rulkua zen an tumna kal mek hi MNF chuan kan hmuhhmaih lo a ni,” a ti.
Kohhran rilru tina zawnga ke pen hi MNF chuan a tih ngai loh thu sawiin Lalruatkima chuan, “FCAA an adopt avangin ZPM sorkar chu Central YMA tan yellow card pek a ngai ta hial mai te hi a lungchhiatthlak a, rintlak loh sorkar an nihzia a ti lang chiang hle,” tiin, kuthnathawktute sawhthing man cheng vaibelchhe tam tak bo mek chhuichhuak tur pawhin MNF chuan theihtawp a chhuah zel dawn tih a sawi.
MNF Legal Board Vice Chairman Lalpianfela pawhin thu sawiin ZPM sorkar chu AR kohhran ram luah mek chhuh luih tumah puhin, “Sorkar pisa chawlh ni, Inrinni pawh sawi lova ZPM sorkarin a hnuaia hnathawk GAD Secretary a sawifiahtir chu mawhphurhna lak ngam lohna, official te kuta rulkaw zen tumna zahpuiawm tak a ni a, sorkar hnathawkte thu dik famkim lo hmanga sawifiahna siamtir chu an lal khak zia langsar taka lanchhuahna a ni,” a ti.
Sorkar insawifiahnaa lo lang, Kristiante biak in leh Mandir huang khata an dah phei hi chuan Pathian lal ram din tum sorkar an nih lohzia a tar lang chiang hle tih a sawi.