Supply Minister B. Lalchhanzova chuan hunpui kan hmachhawn turah gas lama harsatna awm lo tura an inbuatsaih mek thu a sawi a, home delivery an kalpui mek pawh March, 2026 ah chuan Aizawl khawpui chhunga peih fel hman vek an inbeisei thu a sawi.
Gas la tura intlarput leh a lo thlen hun tlumtea thlir taka kan lo thlir fo thin, chhungkaw buaina tling pha fo thin chu a kiam chho zel dawn niin a lang a, hei hi hmasawnna nasa tak pakhat chu a ni reng bawk a ni.
Home delivery pawh hi veng tam takin a takin kalpui tawh mahse, vawiin thlengin la tihlei thei lo an la awm reng a, a dan dik taka kal tur a nih chuan tih thuai hi chu agency lam leh LC lam inberawn chunga tih tur niin a lang a, mipuite pawhin kan dikna chanvo kan hmuh theihna tur a ni bawk.
Gas ah harsatna kan tawk fo thin a, a bik takin hunpui lai phei chuan mamawhna a sang zual thin. Hemi hrerenga department lamin hma an la hi a lawmawm a, an inruahman ang ngei hian home delivery pawh hi tihfel tum thuai thuai ngei teh se.
Hetih lai hian Mizo thalaite hian hnathawh tur kan neih belh zual dawn tih hria ila, a tawng thiam leh ziak leh chhiar thiam zawk kan nih ang ngeiin home delivery hna pawh hi hnamdang kuta dah mai lova, kan eizawnna kawnga kan hnathar a nih hriain thawh leh luh tam ngei i tum tlang bawk ang u.