Aizawl: Mizoram pawna thawhchhuah tur Mizo hmarchate metric ton 5 chu Zirtawpni khan Rural Development Minister Prof Lalnilawma’n Chhingchhip atangin a vai liam.
Mizo hmarchate te hi Mizoram State Rural Livelihoods Mission (MzSRLM) hnuaia din Ropuiliani Women Farmer Producer Company Limited member-te tharchhuah niin, MIFCO Complex, Chhingchip atangin a vai liam.
Vai liam puala inkhawmah thu sawiin RD Minister Prof Lalnilawma chuan Ropuiliani Women Farmer Producer Company-te hmalakna chu fakawm a tih thu a sawi a. Mizo hmarcha bik hi ram pawna an thawn chhuah tawh thin chu Mizo hmarcha a nihna a lang tawh thin loh avangin, Mizoram atanga thawnchhuah a ni tih lantir zel anih tawh thu leh Mizo hminga a kal tawh thu a sawi.
RD minister chuan, “Mizoramin kan thlai tharte kan thawnchhuah dawn chuan a grading kan uluk a tul a, chuti a nih loh chuan belhchian an dawl lo ang a, rei kan daih dawn lo a ni,” tiin, tuna Mizo hmarcha thawhchhuahna hun hman hian rah tha chhuah se a duh thu a sawi.
Thlai thar hralhna chungchangah harsatna neuh neuh a awm thin chu MzSRLM leh sorkar atang te leh company atang te pawhin theihtawp an chhuah zel tur thu a sawi bawk.
Ropuiliani Women Farmer Producer Company Limited hi Mizoram State Rural Livelihoods Mission (MzSRLM), Rural Development & Administration Department hnuaia sub-scheme pakhat Mahila Kisan Sashaktikaran Pariyojana (MKSP) Value Chain project kaltlanga din a ni. He Company kaltlang hian MzSRLM hnuaia Self Help Group member hmeichhiate chu shareholders a ziahluh an ni a, Producer Company kaltlang hian Sawhthing, Mizo Hmarcha leh Aieng hralhna mumal zawk an neih theih nan hmalakna kalpui mek a ni.