Aizawl: LADC term kal mekah sorkar ngelnghet tak din chu kohhran duh dan a nih thu Lairam Isua Krista Baptist Kohhran (LIKBK) General Secretary Rev. LH. Lalpekhlua’n a sawi.
LIKBK Assembly hruaituten Zirtawpni khan 12th Lai Autonomous District Council sorkar term kal meka member-te Lawngtlai-a LIKBK Centenary Hall-ah an kawm a. Sorkar kaihhruai kawnga an ngaih pawimawh leh rawtna hrang hrang an neihte an sawipui.
An inkawmnaah hian LIKBK general secretary chuan an hriat theuh angin LADC sorkar term liamtaah khan sorkar ngelnghet ding hlei thei lovin thuneihna a inthlak sek a, kha kha mipuiin an tawrh bakah hnam pum tan pawh a mualpho thlak avangin LADC term tharah chuan sorkar ngelnghet tak neih an beisei tih a sawi.
LADC sorkar hotute chu an rorelnaah hleih nei lova rorel tur leh mi tin ang khata en tur te, eirukna tibo tur te, zirna siam tha tura hmala tur te, ram leilung, ramngaw leh nungcha humhalh kawnga tan la thar tur te, Lai tawng, Lai culture leh Lai nunphung humhalh a, tihhmasawn tur te, Lairam leh hnam hmasawnna atana LADC budget pawn lam atanga sum hai lut tura project hrang hrang siam tur te, faina leh thianghlimna kawnga tanla thar tur te, LADC huam chhungah dan ang taka sumdawnna kalpui a nih theih nan hmala tur te, midang hming hawha sumdawnna kalpui a nih loh nan tan la thar tur te, Bazar hmun mumal taka siam tur leh ram leilung fa ni lovin LADC area-a ram an neih loh nan hma la turin an beisei dawn tih a sawi.