Aizawl: Reliance Foundation leh Mizoram Football Association (MFA) buatsaih, naupangte football inelnain match 10,000 khelh tlin a nih puala Rajiv Gandhi Stadium, Mualpui, Aizawla hun tawi buatsaih chu Inrinni khan Sports Minister Lalnghinglova Hmar-in a hmanpui.
Sports Minister chuan, “India-a a vawi khatna ni turin Reliance Foundation chuan Mizoramah naupangte awmze neia football an zirna turin league mumal tak a kalpui a, Naupang League tih hi football hmasawnna atan, naupang chher chhuahna atan leh discipline kenkawhna atan duhthusam a ni,” a ti a, a bul tantu zinga a tel ve thei lawmawm a tih thu sawiin, tuna a thlen chin chu an ngaihtuah phak piah lam a nih tawh thu a sawi.
MFA president ni bawk chuan, “Tun hmain Mizo naupangin an naupanlaiin jersey ha chunga referee hnuaia inkhelhna mumal an nei phak lo a, match 10 pawh khel tling mang loin India inelna an hmachhawn fo tawh thin. Naupang League-a telte erawh chuan kum khatah competitive match 30 chuang in khel a, in nihlawh takzet a, in hmabak a êng hle a ni,” tiin a fuih.
Naupang League hi Aizawl, Lunglei, Champhai leh Kolasib-ah kalpui niin naupang kum 6-14 inkar inelna a ni a, kum 2022-a khelh tan niin a senso hi Reliance Foundation-in a tum a, MFA leh an hnuaia district football association-in a kalpui a, naupangte hian kum khatah competitive match vawi 30 chuang an khel a ni.
Tun dinhmunah Naupang League hnuaiah hian district paliah naupang 3,500 chuang an awm mek.