Mahni awmna party dik lohna hmu thei miah lo, lehlam pawlte chan chhiat theihna zawng rana politics khelh hi a lo awm thei dawn ni hian a lang thin.
Kan awmna party tan chuan theihatwp kan chhuah tur chu a ni ngei mai a, mahse pute tihlungawi tum luat vanga midang chhiatna lai chauh sawi duh hi kan tam ang tih a hlauhawm thin ta mange.
Sorkar kal mek leh kal tawh hrang hrangah thu inchuh emaw, dik lohna lai inhaichhuahsak nia insawiin, issue lian pui pui a awm thin a, vawiin thlengin a la awm ta zel bawk.
Heng thil hrang hrangah hian mipui hmaa inbei vak vak a, mahni dikna lai sawi zuah zuah zel hi kan theihtawk ni mai hian a la lang thin a, huaisen taka ke pen zui ngam an la awm meuh lo niin a lang.
Mipa takin, a dik lo chu rekchhuak chat mai turin ke pen ngam hlawm se la, rala inbei a, media hmaa inchachhuah vak vak lo hian thuneitute chhui theih tura ke kan pen belh hret ngam hi a hun ta viauin a lang. Chutiang a thlen hnua dingchangtate chu mipui pawhin kan ngaihsan tur leh an ke pen a dikzia kan hriatna tur chu a ni zawk dawn lo’mni?
FIR a ni emaw, CBI a ni emaw, engpawh hi chhui theih loh a awm lo a, ral atanga inchhaih lo hian ke pen belh ngam se la, mipa chuan mipa takin a nih dan tur takin ke pen belh hret i ngam ang u.