Aizawl: Mizoram Pradesh Congress Committee (MPCC) President Lal Thanzara’n Sairang rel station-a bazar nî siam tum chu tha an ti lo tih sawiin, bazar nî siam a nih chuan ‘hnam dang sumdawnna nî’ an siam dawn tihna a nih thu a sawi.
MPCC-in Thawhtannia Congress Bhavan-a Party Political Session an neihah thu sawiin MPCC President chuan, chawlhkar kalta Thawhtannia Chief Minister-in Assembly House session-ah ‘Sairang rel station-ah bazar nî siam tum a ni’ a tih chu tha an tih loh thu sawiin, Mizoram pawisa luanralna nî a ni ang a ti.
Lal Thanzara chuan, “Mizo chawhmeh lei turin state pawn mite an lo kal khawm dawn lo va, chawhmeh leh bungrua, thawmhnaw zawrh tur an rawn keng lut teuh dawn a. Sumdawnna a inchimralna tur kawng pakhat a ni thei bawk a. Mizo sumdawngte tan a tha lo a, mahni thlai thar zuartute tan a tha lo bawk a. Sorkar hian ngaihtuah nawn se,” a ti.
MPCC president chuan ‘The Mizo Marriage and Inheritance of Property (Amendment) Bill, 2026’ Assembly House-a pu luttu chief minister-in ‘Sorkar tih a ni lo’ tia NGO pressure avanga bill pu lut a nih thu a sawi ta daih chu mawhphurhna lak ngam loh vang a ni a ti a. CM bill put luh, House-a pass aia sorkar tih thil dang a awm thei lo va. Chief minister-in a hmalaknaah hian mi dang dem tur zawng lovin mawh la ngam rawh se, a ti.
Hnam hi thisen avanga kan neih a ni a. India constitution-in a tihdanglam theih a ni lo tih sawiin Lal Thanzara chuan, “Mizo Hmeichhiain mi tupawh pasalah neiin khawi hmunah pawh, state dang leh ram pawnah pawh awm se Mizo a ni reng ang. Mizo danah Mizo hmeichhiain pasalte hnam an tawm ngai lo, a ti bawk.