Austin, Texas-a beer huan pawnah silai hmehpuah a ni a, FBI-in firfiakte nena inzawm a nih thu an sawi a, he thil thlengah hian mi pahnih an thi a, mi 20 chuangin hliam an tuar bawk.
A kaptu nia hriat hi Ndiaga Diagne a ni a, Senegal-a piang, American khua leh tui niin CBS News leh US chanchinbu dangte chuan an tar lang hlawm.
Pathianni zing dar 02:00 (India-a chhun dar 01:30) vel khan US thlang lam state khawpuia Buford’s bar bulah mi kap an awm tih thu an dawn bawhzuiin dan kengkawhtute an chhuak a, a kaptu nia puh hi an kap hlum a, ani nen hian mi pathum an thi a ni.
Police-te chuan silai a hmeh puah chhan hi an la sawi lo va, Diagne-a hi tun hma lamin thuneitute hmelhriat theih turin pawi khawihna a la neih an hre lo va. Dam chhuak zinga 14 chu damdawi in panpui an ni a, mi pathum chu an dinhmun a tha vak lo.
A chhuitute hnenah a hretute chuan silai kengtu hian kawrlum phiar a ha a, ‘Property of Allah’ tih a inziak tih an hrilh.
Austin Police Chief Lisa Davis chuan East Sixth Street tia hriat, bar district tia hriat lar zawk, mipui tamna hmuna patrol-a awm officer-te chuan West Sixth Street hnuai lam hla zawka awm Buford’s-a mi pakhat silai keng nia report chu rang takin an chhang let nghal tih a sawi.
Buford-a bula SUV lian tak khalh mi pakhat chuan a tukverh atangin pistol a kap a, bar pawn lama lo dingte a kap niin a sawi.
A bulah hian lirthei a dah a, rifle la chhuakin bar a pan leh niin Davis-a chuan a sawi a. Police officer pathumin kawngpui intawhna laiah hmachhawnin an kap hlum a ni.
A SUV an dapnaah puak thei thil dang a keng lo niin an sawi.
FBI San Antonio office atanga Acting Special Agent in Charge Alex Doran-a SUV leh a kaptu nia sawi chungchangah hian ‘firfiak nena inzawmna’ a awm thu a sawi a. ‘Chipchiar puan turin an la inpeih lo’ tih a sawi bawk.
Damdawi ina hruai mi 14 zinga pathum chu an dinhmun a tha lo hle tih Austin-Travis County Emergency Management Services head Rob Luckritz chuan a sawi.
US President Donald Trump-a pawh he thil thleng hi hriattir a ni tawh tih White House Press Secretary Karoline Leavitt-i chuan a sawi.
Texas aiawha Republican Senator Ted Cruz chuan social media-a a post-ah he pawikhawihna rapthlak tak hi a dem thu a sawi.
Austin hi Texas khawpui leh state chhunga university lian ber zinga mi, University of Texas awmna a ni a, zirna in hi Buford’s atanga km 3.2 leka awm a ni.
East Sixth Street leh West Sixth Street hi zirlai 55,000 vel awmna hmun a ni a, kar tawp tamah an tlawh fo thin.