Aizawl: Sports Minister Lalnghinglova Hmar chuan Tuichangral Games & Sports Association (TGSA) buatsaih, April 13–22, 2026 chhunga Khawhaia neih tur, Tuichangral Games 2026 chu Thawhtanni zan khan a hawng.
Khawhai Town Hall-a hawnna inkhawmah Sports Minister chuan Tuichangral Games chu GSA leh mipui tangrualin an buatsaih a nih avangin a ngaihlu hle tih a sawi a. Minister dinhmun a luah tirha a tih hmasak ber pakhat chu Tuichangral leh Tuipuiral Games tihmasawn tura hmalak a nih thu a sawi a. Mipuiten games chu lo ngaihlu sauh sauh tur leh a bikin kum naupang zawk tana Olympic sports discipline-a inelna buatsaih thin chu ngai thu tak zel turin a chah.
Sports Minister chuan sorkarin Olympic 2036 hmathlir neiin a bulthut atangin sports a kalpui tih a sawi a. Empowering Mizoram Sports (EMS) kaltlangin Mizoram sorkarin infiammite bana kaihna tur a kalpui mek tih a sawi a, infrastructure lam buaipui thulh lovin a pawimawh zawk infiam mite chher chhuah chu an tum lian ber a nih thu a sawi a. “Sports infrastructure leh thil dang kan ngaih pawimawh rualin infiam mite theihna tihhmasawn kan ngai pawimawh ber a, a bulthut atangin coaching tha pek kan duh,” a ti.
Khualzahawm Lalmuanpuia Punte, MLA pawhin thu sawiin, Tuichangralte sports lama hma an sawn chu lawmawm a tih thu a sawi a. Infiamna hi inunauna titha zawng leh tihmasawn zawnga kalpui a nih loh chuan khua leh khua inerna leh inhuatna thlentu a ni duh khawp mai, a ti a. Infiamna hi a tha zawnga kalpui zel turin leh talent nei tha tak takte zawn chhuahna atana tangkai taka hmang turin duhsakna a hlan.
Tuichangral Games 2026 ah hian Football (mipa leh hmeichhia), Volleyball (mipa leh hmeichhia) bakah kum 16 hnuai lam tan Boxing, Wrestling leh Weightlifting-ah te inelna neih a ni dawn a ni.