Aizawl: BJP Mizoram President Dr K Beichhua chuan BJP chu development party an nih angin development an duh chuan BJP an vote a ngai tih a sawi.
Aizawl Municipal Corporation (AMC) inthlan lo awm tura BJP Mizoramin Inrinnia Mualpui kawn, Salem Veng (Zero Point)-a street campaign an buatsaihah BJP state president chuan politics chu mi tin tan a ni a, sumdawng an ni emaw, taxi khalh an ni emaw, inhlawhfa chawpa eizawngte pawh an vaiin politic-in a nghawng avangin politic an ngaihtuah a ngai tih a sawi.
Sorkar tha hnuaiah chuan sorkar hnathawkte an hlim thin tih sawiin, “Sumdawng hrang hrang, chawhmeh zuar chenin an thil hralh a pung a, tlai lamah chuan an ipte a puar thin. Inhlawhfate pawhin hnathawh tur an ngah a, mi tin an hlimin an lawm thin a, chutiang chu a taka Aizawlah a thlen theih nan sorkar tha an mamawh a, mipui mamawh pe theitu sorkar an neih a ngai,” a ti.
Dr. K. Beichhua chuan BJP chu development party an ni a, development chu India ram puma BJP mission a ni a, development an duh chuan BJP an vote a ngai tih a sawi a. Chutiang sorkar nei thei dinhmunah chuan an ding mek a, a bul tanna atan AMC election chu an hman a ngai tih sawiin, Aizawl khawpui changkang leh thianghlim, khawpui hrisel, mipui harsatna ata khai chhuak thei tur BJP candidate-te vote theuh turin a sawm.