Aizawl: Mizoram Journalists’ Welfare Society (MJWS) General Body Meeting chuan Mizoram Journalist Pension Scheme 2023 budget head hrana dah an pawm.
Nilaini chawhnua I&PR Auditorium-a MJWS Chairman, I&PR Secretary ni bawk Betsy Zothanpari Sailo kaihhruai thutkhawmah hian MJWS Constitution & Rules tihdanglam rawtnate leh journalist kaihhnawih thil pawimawh hrang hrangte ngaihtuah a ni.
Thutkhawmah hian MJA MJA member-te MUHCS 2.0-a inziah luh chungchang, MJWS annual fee tihsan chungchang, MJWS family declaration ennawn, Journalist thite sorkarin a ralna (ex-gratia) tihpun chungchang, MJWS atanga MJA member-te damdawi ina an inenkawlna senso phuhrukna/tanpuina, medical financial assistance tihpun chungchang, MJWS Rules anga MJWS tana sorkarin sum a dah (grant in aid)-te a zavaia MJWS hnena pek nghal chungchang te leh Mizoram Journalist Pension Scheme 2023 budget head hrana dahte an pawm a ni.
Thutkhawmah hian MJWS Member Secretary, I&PR Director ni bawk K Vanlalsangi leh MJA General Headquarters President Vanlalrema Vantawl-ten thu an sawi bakah MJWS member, I&PR Dy. Director ni bawk, Lalnunmawii’n report a pe a ni.