Aizawl: MPCC President Lal Thanzara chuan MNF leh ZPM ten Mizoramah ro an rel chhung hian ram leh hnam, sakhua a him lo hle tih a sawi.
Ningania Champhai District Congress Bhavan sakna tur lungphum a phum zawkah Champhai Venglai Community Hall-a vantlang inkhawmah thu sawiin Lal Thanzara chuan, hun kaltaah MNF ten ro an rel a. Tun kum hnih kal ta atangin ZPM-ten ro an rel bawk tih sawiin, “MNF leh ZPM ten ro an rel chhung hian kan ram, kan hnam, kan sakhua a him lo hle,” a ti.
Lal Thanzara chuan MNF-te NDA atanga inhnuk dawk duh loin BJP an la thawhpui reng tih sawiin, ZPM MP chu Parliament lamah BJP thlawptu lamah a thu a. BJP Leaders Meeting ah a tel bawk. BJP avanga India rama Kristian tawrhna hi a nasa em em a. Missionary-te tan rawngbawl a harsa ta hle. Mizoram leh hnam, sakhaw tana BJP leh a lam tangte hi an hnawl a hun tak zet tih a sawi.
MNF ten rorelna an chelh laiin Kamrula hmangin sum an siam a. Minister-te an hausa em em a. Mipuiin duh loin an hnawl ta a. ZPM-ten rorelna an han chang ve a. Kum hnih chuang awrh an sorkar a, sum leh paia an duham em em a, tun hnaiah midang picnic spot nia hriat Minister fanu ta alo ni thut maite hi a lungchhiat thlak hle a. Buhfai supply danah thil dik lo tam tak a inphum ru niin hotuten an hria a. Buhfai bag 800 phur thei bike te pawh a awm ni awm tak a ni a. He thil dik lo tak hi kan umzui zel dawn a ni, a ti bawk.
Inkhawmah hian MPCC Sr. Vice President Lalnunmawia Chuaungo pawhin thu a sawi a. MPCC President hian Congress party-ah mi thar eng emaw zat a lawm lut bawk.