All India Adivasi Congress Committee (AIACC), National Executive Member Zodintluanga Ralte chuan BJP kaihhruai NDA sorkar chuan Women’s Reservation chungchang hmaithinghawnga hmangin India political map thlak danglama an party-in hlawkna a neih theihna turin delimitation kalpui a tum chu eptuten a him lo tiin an dodal mai a ni tih a sawi.
MPCC Adviser Zodintluanga Ralte chuan BJP hian thiam takin Women’s Reservation Bill, kum 2023 daih tawha India rorelna in sang pahnihin a lo pawm tawh chu a nihna anga kalpuia dan siam mai lovin census leh delimitation nen kaihkawpa an hamthatna tura thlawptu a neih tamna state-a Lok Sabha seat tihpun chiam a tum a, hei hi eptu party-ten ram tan a him tawk dawn lo tiin an hnawl tih sawiin, “Hmeichhiate chanvo hmangaih leh ngai pawimawh awm taka lana delimitation siam an tum hi politic-a hmalakna tenawm leh thil lungchhiatthlak tak a ni,” a ti.
AICC leh Rahul Gandhi-a hmalakna a thlawp tlat tih sawiin minister hlui, Zodintluanga Ralte chuan, prime minister hian politics-a hmeichhe chanvo tha zawk hi duh tak tak ni sela kum 2023-a pass vek tawh hi census leh delimitation chhuanlama hmangin a dang hauh lo vang tih hi ka hmuh dan leh thil awm dan dik tak a ni tih a sawi.
Congress party chuan politic-a hmeichhe dinhmun chawisan piah lamah hnam hnufual zawk – OBC, ST leh SC hmeichhiate hamthatna thlengin a ngaihtuah tih a sawi bawk.