Indian sorkar chuan tuialhthei man tihsan tumna a awm lo tih a sawi a, Asia khawthlanga ram leh ram inepna boruak sang zel leh khawvela energy sumdawnna a nghawng mek karah hlauhthawnna awm mek chu thlentir a tum lo.
Petroleum & Natural Gas Ministry Joint Secretary Sujata Sharma-a Thawhlehnia inter-ministerial briefing-ah sorkarin boruak inthlak danglam zel a enfiah chhunzawm zel a, petrol leh diesel man a danglam dawn lo tih a sawi a ni.
Sharma-a chuan, “LPG, petrol leh diesel hi tam tawk a awm a, a man pawh a la sang lo va; chuvangin, hlauthawng lo turin kan ngen a che u,” a ti.
Ni tina mamawh tuialhthei awm zat tur chungchangah a hmangtute chu a thlamuan a, a chatlak dawn lo tih a sawi.
Sharma-a chuan Asia khawthlanga buaina chhuak mek vangin tuialhthei thlitfim loh, liquefied petroleum gas (LPG) leh piped natural gas (PNG) lak luh a nghawng tih a pawm rualin nghawng tlem thei ang ber a awm theih nan hmalak a nih thu a sawi.
“Sorkar chuan ram chhunga LPG leh PNG hmangtute tan zaa za pek a nih theih nan thil a kalpui a, chutiang bawkin lirtheia hman tur CNG-te tan a ti a ni,” a ti.
Commercial LPG-ah erawh thenkhata nghawng a neih laiin a awm thei zat 70% velah vantlang tan dah a ni a, damdawi in leh zirna in ang chi sector pawimawh bikte ngaih pawimawh a ni.
“Inpeknaah chatlak lian tham a awm loh nan damdawi, steel, thlai leh lo neihna bakah industry pawimawh tak takte pawh ngaih pawimawh a ni,” tiin a sawi bawk.
Sharma-a chuan, “Dinhmun derthawng bikte pualin inhlawhfaa mahni hmun lova awmte hman thin, kg 5-a rit a thlawna LPG cylinder pek chu a let hnih vel zetin a pung bawk,” a ti.
Sorkarin hetianga a mipuite laka inringtawk taka thu a chhuah hi tuialhthei thar chhuahna hmun pawimawh, Asia khawthlanga thil chiang lo a awm avangin khawvel puma tuialhthei sumdawnna a tlalhniam mek zel lai a ni.
Thuneitute chuan inpekna kawnga harsatna a awm lohna tur leh ram chhunga tuialhthei manah nghawng a neih loh nan thil awm dan hi uluk takin an thlithlai reng tih an sawi.