An reh hlen tawh mai dawn emaw tih tawh hnu, kum ruk kalta khan hla thar an rawn tichhuak hlawl a. Hemi hnuah thawm an rawn nei chhunzawm lem lo va. Mahse, tun hnaiah hla rawn tihchhuah nual tumin hma an la leh tan.
Champhai Pop-Rock band hriat hlawh leh hlawhtling tak, Triau Trackx hian single thar tihchhuah an tum. Chu an single tihchhuah hmasak ber an tum title pawh — Kutzungpui Michael Jackson — tih a ni!
He hla buaipuiin hna hautak ber chu an paltlang tawh. Chu chuan an tihchhuah hun an hnaih tawh hle tihna a kawk thei ang. Mahse, chiang fakin an tihchhuah hun tur hi an la sawi thei mai lo.
April thla tawp lamah tal tihchhuah an tum kha a ni a. Mahse, an thawm a la reh rih hle. He an single tihchhuah hnuah tum leh ruahmanna dang an la nei cheu. Single pakhat chauh tihchhuah an tum lo va, an ruahman lawk dana an awm thei a nih chuan recording nen engkim an inpeih fel vek zawhah hla pasarih vel chu chawlhkar hnih dan velah pakhat te te in tihchhuah an tum a ni.
Triau Trackz band khaipa Ramboss-a chuan, “Tunah chuan kan nulat tlangval laia chet chhuah zung zung kan harsat tawh a. Kan band-in kan ruahman dan deuhah chuan, hla pasarih vel kan record ang a. Chu chu tun chawlhkar thara tan turin. Heng hla kan record te hi chawlhkar hnih dan velah, a thar tihchhuah zel kan tum a. Hla kan tihchhuah inkarah hian sawi ‘hot’ na vel tihchhuah kan tum bawk a. Chutiang vel chu a ni kan ruahman dan, mahse, kan tlin lo ang tih erawh chu ka hlau ru khawp mai,” tiin Thalai Times a hrilh.
An hla buaipui tur zingah, kum 10 chuang kaltaa an hla hit em em — Ka lo nghak reng ang che — tih kha a chhunzawmna hla a awm dawn. Kha hlaah khan, ‘Kalta tur dang i hriat loh chuan, lo haw ta che, ka lo nghak reng ang che…’ tih tlar a awm kha. Heta ‘ka lo nghak reng ang che’ a tih hian a nghak chhuak dawn ta a. Kha nula/tlangval kha a tlan bo atanga kum 10 chuang hnuah a haw dawn tihna a ni ber mai. He hla chhunzawmna ang reng deuh, a thawnthu kharna hla a ni deuh ber.
Chhungkua leh mi mal thil vel buaipui an band an kal hleih theih loh hnuah, hun eng emaw chen chu Triau Trackx hi an reh deuh vang vang. Hetia an reh deuh vang vang hnuah kum ruk kalta khan hla thar, Mizo hla satire/comedy lam deuh — Ramhuai ka ngaizawng — tih kha an rawn tichhuak a nih kha.