Union Textiles Minister Giriraj Singh chuan Mizorama muga silk pangang khawitute chu hmahruaitu, Muga leader-ah siam an tum tih sawiin Mizoram tan Silk Samagra 2.0 hnuaiah sum thahnem tak sanction a nih thu a sawi.

Union textiles minister chuan Thawhtanni zing khan Zemabawk Sericulture Training Institute (STI) tlawhin silk pangang hmanga eizawngtu farmer-te leh puantahtute a kawm a. STI Conference Hall-a programme buatsaihah Mizorama khaw 211-a farmer-te chu anmahni nena inzawmna thuk zawk siam tura lo kal a ni tih a sawi.

Union minister chuan Mizorama muga silk pangang khawitute chu hmahruaitu, muga leader-ah siam a tum tih sawiin Mizoram tan Silk Samagra 2.0 hnuaiah sum thahnem tak sanction a nih thu a sawi a. Silk Samagra 2.0 hnuaiah Mizoramin Processing Unit a din a, Mizoram farmer-te cocoon thar chhuah pawh state danga hralh chhuah a nih thu leh Mizoram State Flagship Programme – Bana kaih hnuaiah sericulture department ngaih pawimawh a nih thu a sawi bawk.

Mizoram chu hmarchhak state zawng zawng zingah silk chi li – Muga, Eri, Mulberry leh Tasar nei thei awmchhun a ni tih sawiin union minister chuan Mizoram sik leh sa leh lei (soil) chu sericulture tan a tha tih a sawi a. Silk-a eizawnnain hma a sawn zual theih nan Mizoram chu cluster-ah inthen se a duh thu a sawi.

Singh chuan district pali – Lunglei, Champhai, Saitual leh Siaha chu Muga District atan, district dang zawng chu silk variety dang khawi nan hmang se, a ti a. Cluster siama hmalak hian farmer-te zingah hmasawnna chak zawka a thlen avangin cluster behchhana hma an la a nih chuan Central Silk Board-in a tanpui dawn tih a sawi bawk.

Union minister hi Sericulture Minister Lalthansanga leh sorkar mi pawimawhten an tawiawm a, he hunah hian Som tree phunna hun an hmang bawk.

‘Golden State’ tia Mizoram koh duh

Zan khat riaka Mizoram tlawha zin Union Textiles Minister Singh-a chuan silk vang leh tha bika an sawi, Muga silk chu Mizorama a tam thu sawiin, Mizoram chu ‘Golden State’ tih hiala koh a duh tih a sawi.

Union Minister Singh hian Thawhtanni khan Mizoram Handloom & Handicrafts Development Corporation Limited (ZOHANDCO) office a tlawh. Sericulture Minister Lalthansanga’n a tawiawm.

Union textiles minister pual hian ZOHANDCO hian exhibition an buatsaih a, Mizo puantah hrang hrangte leh thiamhnangdeh lam hawi an siam chhuah an pho lante chu a en a. Puantahtute leh sumdawngte nen inkawmhona hun tawi an buatsaih bawk.

Union Minister Singh chuan silk vâng leh tha bika an sawi, Muga silk chu Mizorama a tam thu sawiin, Mizoram chu ‘Golden State’ tih hiala koh a duh tih a sawi a. Kum 2035-ah chuan silk metric ton 1,000 aia tam an dehchhuah theih ngei a beisei thu leh central sorkar chuan kuthnathawktute hmasawn zelna atan sum pek chhuah an ui loh thu a sawi.

Hmeichhiate chawikan pawimawhzia sawiin union minister chuan Lakhpati Didi scheme chu tangkai zawka hmang turin puantahtu nuho a chah a. He scheme hnuaiah hian tun dinhmunah Rs nuai 5 thleng pek theih niin, Rs nuai 10 thlenga dawn theih tura siam an tum thu a sawi bawk.